Полонины поможе спропаґовати новый меджінародный проєкт

Розвитку теріторії Народного Парку Полонины має помочі новый меджінародный проєкт Greenhealth. Інформує о тім Одділіня комунікації Пряшівского самосправного краю.

Цільом проєкту є сприступнити локаліты реґіону і выбудовати з нього турістічно атрактівне оточіня, но з акцентом на охрану природы. Єдным з партнерів проєкту є Пряшівскый самосправный край (ПСК). Співпрацовати на нім буде з Народным парком полонины і Астрономічнов обсерваторійов у Колоніці, котрой є ПСК зряджовательом.

В Полонинах надвяже проєкт на уж розбігнуты і планованы актівности заміряны на утримательный розвиток і екотурізм.

Співпраца веце країн

Пряшівска жупа стала єдным із семох партнерів проєкту Greenhealth, далшы суть з Іспанії, Хорватії, Швеції, Польщі, Ірландії і Німецька. Посередництвом такзваных „мягкых актівностей“ є проєкт заміряный на укріпіня звязів меджі охранов біодіверзты і людьскым здоровльом.

ПСК посередництвом проєкту прямо підпорить Народный парк Полонины при дізайнованю і креованю новых продуктів турістічного руху.

„Полонины належать меджі нашы дорогоцінности і є то реґіон, котрый має з погляду турістічного руху і турізму величезный, може затля скрытый потенціал. Намагаме ся го розвивати посередництвом будованя ціклотрас і меншой інфраштруктуры, посередництвом підпоры малого і середнього подниканя через шпеціалны вызвы заміряны на будованя заряджінь про уквартельованя і іновації служеб, а в неподліднім ряді помаганьом тутешнім селам,“ повів в повязаню з проєктом председа ПСК Мілан Маєрьскый.

За його словами Народный парк Полонины має што понукнути людям і його локаліты собі заслужать увагу, жебы приходило до нього іщі веце турістів.

„Якраз проєкт Greenhealth нам в тім може значно помочі, як прикладами доброй практікы зо заграніча, так і будованьом фаховых капаціт і приправов новых проєктів, самособов, то вшытко з акцентом на охрану природы,“ продовжовав пряшівскый жупан Маєрьскый.

Лісны купелі і жыва лабораторія

Актівности проєкту Greenhealth конкретно заміряють ся на новы продукты турістічного руху, як суть nordic walking, ціклотрасы, лісны купелі ці лісны терапії.

Початочнов фазов буде створіня містной жывой лабораторії, такзваного Local Living Labs. Лабораторія рахує з участьов реґіоналных і містных заінтересованых сторон, фаховых партнерів, представителів орґанізацій про хранены области ці областей здравотных політік, академічной громады і односных містных і реґіоналнх урядів на реґуларных стрічах.

Занимати ся будуть темов впливу храненых теріторій на людьске здоровля і наслідно приготовлять інвестіцію, припадно даякы крокы на даній теріторії.

Далшов актівносьтов має быти выпрацованя частковых реґіоналных штудій залученых партнерів і наслідно посередництвом партіціпації з містнов жывов лабораторійов приправа сполочной штудії включно аналізы і планів.

Проєкт Greenhealth Утримательны хранены теріторії як ключова цінность про якостный жывот быв схваленый в рамках проґраму Interreg Europe, і його ведучім партнером є автономна общіна реґіону Мурсія – Ґенералный директоріят жывотного оточіня.

Має помочі довогодобому цілю ПСК, ку котрому обовязала ся жупа іщі у 2018-ім році, і то розвивати ендоґенный потенціал окресу Снина.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА