Погіряне і сусіды – одкрытя выставы

Погіряне і сусіды – традицийне народне облечыня, таку назу має найблизша выстава, якой одкрытя буде проходило 15. мая о 17.00 год. в дворскій официні при Каштели в Шымбарку. Орґанізатором выставы єст Скансесн в Шымбарку, одділ Музею Дворы Карвациянів і Ґладышів в Ґорлицях.

Подіі товаришыл буде концерт капелі Погіряне та показ моды традицийных народных строів. На выставі, окрем народного строю Погірян, запрезентуваны будут тіж облечыня сусідуючых з Погірянами етнічных і етноґрафічных ґруп. Буде мож видіти, очывидні, лемківскій стрій, але тіж традицийну одежу Сандецкых Ляхів і Шаришан з обшыри Словациі.

Презентуваны експонаты походят з колекциі Музею Дворы Карвациянів і Ґладышів в Ґорлицях, Округового Музею в Новым Санчы, Шаришского Музею в Бардийові та Музею Лемківской Культуры в Зындранові.

Выстава буде мож обзерати од 15. мая до 20. липця т.р. Вступне дармо.

фот. audiovis.nac.gov.pl