Почав выходити новый часопис Карпатознавство

Як інформовав голова Русиньского културолоґічного клубу Юрій Шиповіч, 12-го юла 2024-го року в ужгородьскім Закарпатськім музею народной архіктуры і бываня – сканзені, одбыла ся презентація нового краєзнавчого часопису, котрый дістав назву Карпатознавство.

Новый журнал вышов повнофаребно на 64-ох боках з тіражов 200 фалатків у выдавательстві РІК-У в Ужгороді. Основательом часопису, котрый є заміряный на веце научны статі із области карпаторусиністікы, а нелем, є голова орґанізації Карпатьскый Русин – Василь Щербей, якый выданя і профінанцовав.

Головным редактором журнала став Маріян Токар із Ужгородьской націоналной універзіты. Часопис Карпатознавство має статі писаны на україньскім языку, но першоджерела выходять оріґінално на русиньскім языку.

Меджі дописователями нового научного журнала суть і далшы познаты мена в русиньскых кругах як Володимір Фенич, Михаіл Зан, Димитрій Поп ці Петро Ґабрин. Журнал має рубрікы Актуалне інтервю, Розмотаваня міфів, Култура і традіції, Карпаторусиністіка, Краєзнавча портретістіка, Із першоджерел.

Головный редактор журнала Карпатознавство Маріян Токар у вступнім слові пояснив, же найважнішым є, жебы інтерпретація реґіоналной історії, розумій Підкарпатя, обсяговала і погляды авторів журнала, котры бы хотіли переломити історічны стереотіпы і мылкы, котры опвливнюють сприниманя реґіоналных дій і фактів, але і людьскы долі.

Токар вылучів публікованя в часописі будьякых статей, котры бы обсяговали русинофобну, українофобну і іншу нетолерантну ретопріку.

Член редакчной колеґії Володимір Фенич, так само із Ужгородьской націоналной універзіты, підкреслив, же новый журнал не має быти конкуренційов русиньскому журналу Отцюзнина, а має лем доповнити тото русиноязычне выданя.

Сам Фенич є і актівным дописовательом журнала Отцюзнина, котрый выдає Закарпатьске областне науково-културолоґічне Общество імени Александра Духновіча вєдно із Русиньскым културолоґічным клубом, і шефредактором є Юрій Шиповіч.