Початок желізничных получынь медже Русинами

Уж в найблизшу суботу, 27. серпня/авґуста, буде мож потягом доіхати з Ряшова, через лупківскій тунель з граничным переходом на Лемковині, до Меджелабірців на Пряшівскій Руси. Мат то быти початок постійного вакацийного желізничноого получыня медже тыма містами.

Локальны власти обох держав – представникы Маршалківского Уряду Підкарпатского Воєвідства та Пряшівского Краю, уж од долшого часу дискутиют над тым, што робити, жебы збільшыти туристичний рух в приграничній обшыри і выпромувати оба реґіоны. Єдном з думок, якой реалізация могучо причынила бы ся до реалізациі обох ціли, єст приверніня постійного приграничного желізничного получыня. В тій справі проходили уж конкретны бесіды.

Суботній переізд потягу буде курсом, якій мат промувати получыня столиці підкарпатского воєвідства в Польщы зо Словацийом. Потяг выіхат з Ряшова о 6.30 год. Буде ся мож до него досідати в пізнійшых годинах на наступных стациях, м.ін. в Яслі, Коросні, Саноку, Команчы ци Лупкові. Плянуваний час приізду до Меджелабірців то 11.30 год., тым самым подорож буде тырвала коло 5 годин. Переізд з Лупкова до Меджелабірців буде безплатний, але на одтинок до Лупкова треба буде мати выкуплений білет.

Орґанізаторами цілой акциі сут Маршалківскій Уряд при участи Реґіональных Перевозів (желізнична компанія в Польщы), Стоваришыня «Люблю Желізницю», ґміна Загіря та місто Меджелабірці. Бургомайстер того міста задеклярувал для участників перезіду м.ін. безплатний вступ до Музею Енді Варголя, а в амфітеатрі – концерт. Запрезентуют ся м.ін. ансамбль Поланьце зо Середнього Великого, Віктор ци Абба Шов.

Пасажеры будут мати час тіж на індивідуальне звиджаня міста, понеже плянуваний час одъізду потягу то 17.00 год. Другій такій переізд можливий буде 24. вересня/септембра. При тій нагоді плянуваны сут дальшы бесіды самуорядовых власти Підкарпатского Воєвідства і Пряшівского Краю, котры мают замірене урухомити реґулярны желізничны получыня медже державами, што мало бы ся довершыти найпізнійше на другій рік. Необхідны сут до того одповідні порозумліня і умовы на ріжных рішучых рівнях, зачынаючы од міністерств дс. транспорту, специяльны комисиі, по локальны власти.

Обі страны Карпат были получены желізничным споіньом в другій половині ХІХ ст. Од 1872 рока зачала фунґувати Перша Угорско-Галицка Желізниця, яка лучыла Будапешт з Твердыньом Перемышль і Львовом. Желізниця мала великє стратеґічне значыня. В 1874 році скінчено рыхтуваня тунелю в Лупкові – мат він 461 метрів долгости. Тунель был аж штыріраз высаджeний (в 1914 році через Австрияків, o рік – Росиянaми, пак – через Поляків в 1939 році і Німців в 1944 році). В 1946 році был одбудуваний і з той нагоды по обох странах вмурувано памятны таблиці. Єднак желізничны получыня з Лупкова на Словацию вернули зас аж в 1999 році. Потягы курсували до кінця 2010 рока.

Парадоксальні, хоц граничной контролі уж неє, медже Польщом а Словацийом такой не фунґуют реґулярны перевозы осіб публичным транспортом. Скуточным вырішыньом того проблему были бы польско-словацкы медженародовы умовы, на основі котрых трансграничны автобусовы або желізничны получыня были бы трактуваны як державны, коли ішли бы до першой (вызначеной конкретні в умові) місцевости по другій страні границі. Одновлене получыня Лупків-Межелабірці дає надію на дальше поліпшыня в тій справі.

Більше про Лупків і лупківскій тунель можете дознати ся з архівального одтинка проґрами А Я[К]…? – за тым мотузком.

Фот. за офіцийным сайтом Маршалківского Уряду.