Початок марця – «Говорить Пряшів» – пятниця, 20.00 год.

Не попустило. Морозя надале тримат. Студін по фрасі. Не годен за долго по дворі ходити. Ліпше сой сісти при радию, наставити на 106,6, або 103,8 MHz і си лем слухати. Тоты, што даде інде жыют, а не при Ґорлицях ци Польковицях все можут хоснувати вынахід нашых часів – інтернет.

Надале є час Великого Посту, якій буде тырвал цілий марец і кавалец квітня. Быти може ся Вам здає, што мало Вас інформуєме про культурны подіі. Ачий і про некультурны тіж. Досправды є так як думате. Кєд піст то Русины мало імпрез орґанізуют, мало просят в своі культурны порогы. Добрі, же обертаме ся на Пряшів, гын фурт ся штоси діє.

В днешній Книжници.фм поезия Анны Гальчаковой з Пряшівщыны. Але потім вернеме на Лемковину. Буде барз патріотичні за справом спомину в Нашых целебритах про славного «Лемкина», о. Йоана Поляньского – грекокатолицкого священника, выдатного журналисту, священника, секретаря Апольской Адміністрациі Лемковины. При тым вшыткым был він твердым Русином, автором «Историі Лемковины в пяти частях».