У віторок 19-го марца 2024-го року одбыло ся на Архієпархіалнім уряді в Пряшові 35-те пленарне засіданя Рады єрархів Ґрекокатолицькой церькви на Словакії. Інформовав о тім говорця Пряшівской архієпархії Михал Павлишиновіч.
Рада єрархів зышла ся по веце як двох роках. Найвысшый орґан митрополітной церькви sui iuris (свого права) перервав свою роботу по тім, што 25-го апріля 2022-го року Папа римскый Франціск прияв зречіня ся пастырьского ряджіня Пряшівской архієпархії архієпіскопом і митрополітом Йоаном Бабяком.
Рада теперь могла обновити свою діятельность, кедьже од 27-го януара на митрополітнім стілці має Ґрекокатолицька церьков на Словакії Высокопреосвященого Йону Максима, пряшівского архієпіскопа і митрополіту.
Участны были вшыткы членове
Пленарне засіданя одкрыв Высокопреосвященый Йона. Участныма были вшыткы рядны членове, значіть окрім пряшівского архієпіскопа і архієпіскоп Кіріл Василь – кошыцькый єпарха, владыка Петро Руснак – братіславскый єпарха, владыка Мілан Лах – помічный єпіскоп Братіславской єпархії, емерітный пряшівскый архієпіскоп Йоан Бабяк, і емерітный кошыцькый єпарха Мілан Хаутур.
Як інформовав говорця Пряшівской архієпархії, владыка Мілан Лах став новым секретарьом Рады єрархів. Вычеряв на посаді дотеперішнього секретаря, отця Михала Ондерка мол. Участным на засіданю Рады єрархів быв і владыка Маріян Андрій Пацак, емерітный торонтьскый єпарха.
Офіціално схвалили літурґічны зміны
Почас робочого проґраму владыкове занимали ся праздником Пасхы і прияли сполочный проґрам літурґічного празднованя в окремых катедралных соборах в Пряшові, Кошыцях і Братіславі.
Єдночасно Рада єрархів офіціално схвалила Управы про служіня Святой літурґії в Пряшівскій, Кошыцькій і Братіславскій єпархії.
Тот документ быв схваленый іщі восени 2022-го року владыком Петром Руснаком, котрый быв втогды братіславскым єпархом і апостольскым адміністратором Пряшівской архієпархії, і архієпіскопом Кірілом Васильом – кошыцькым єпархіалным єпіскопом.
Документ дає до практікы дакотры приписы, котры находять ся в документі втогдышньой Конґреґації про восточны церькви (днесь Дікастерія) під назвов Інштрукція на аплікацію богослужобных приписів Кодексу канонів восточных церьквей із 1998-го року, і дотеперь в Ґрекокатолицькій церькви на Словакії не были запроваджены.
Іде наприклад о співаня цілых трьох антіфон, 33-го псалму холем почас недільных літурґій і на праздникы, цілых вшыткых єктеній, ці єктенії за оглашеных, дотримованя алітурґічных днів почас Великого посту ітд.
Єпіскопи діскутовали і о писмі, котре адресовала Дікастерія про восточны церькви вшыткым восточным єрархам. О дотеперішніх приправных роботах на новім ґрекокатолицькім катехізмі інформовав на засіданю владыка Маріян Андрій Пацак, котрый вже скоріше быв установленый Радов єрархів за председу робочой катехетічной комісії.
Далше засіданя наплановане в Братіславі
В рамках засіданя Рады єрархів были єпіскопи інформованы і о роботі на приготовліню новых учебників про школярів реліґійной выховы, кедьже в школьскім році 2026/2027 зачне платити нова реформа навчаня реліґії.
Так само выслухали собі ректора священьской семінарії Владиміра Секеру Міклуша і віцеректора Петра Міленкія, котры інформовали о дотеперішніх скушеностях із запроваджіньом пропедевтічного і пасторачного річника у формації богословів, а так само о можливостях запроваджіня до практікы діаконьской службы кандідатів на священство.
Владыкове на кінцю схвалили дату 36-го рядного засіданя Рады єрархів, котре одбуде ся 1-го яла того року в Братіславі.
Ґорлиці 106,6 MHz
