Піттсбурзька метрополія вызберала про Мукачівску єпархію пів міліона доларів. Рекорд быв і у Пряшові

Як інформовав Пресовый центер Кошыцькой єпархії Даніел Черный, Піттсбурзька ґрекокатолицька метрополія, котра є русиньсков церьквов sui iuris (свого права), зорґанізовала найвекшу збірку грошей у своїй історії.

В Піттсбурзькій архієпархії і єпархіях Пассаік, Парма і Фенікс вызберало ся пів міліона доларів. Тоты підуть про Церьков Матірь Піттсбурзькой метрополії – Мукачівску єпархію. Наша стародоавна єпархія грошы схоснує на поміч людям з Україны, котры потеріли од войны, і многы з них нашли притулок на теріторії Мукачівской єпархії, докінця і у фарьскых будовах ґрекокатолицькых парохій.

Піттсбурзькый метрополіта архієпіскоп Вілліам Скурла ся тішыть із щедрости своїх віруючіх. Єдночасно додав, же продовжують в підпорі і штоденній молитві, жебы тото терпіня скінчіло ся.

Як Черный інформовав, і того часу в Піттсбурзьскій метрополії мають священиків, котры походять з теріторії днешньой Україны. Першый ґрекокатолицькый єпіскоп в Піттсбурзі – Васили Такач, быв перед своїм выменованьом за єпіскопа спірітуалом семінарії в Ужгороді.

За щедрость ґрекокатолицькых віруючіх Піттсбурзькой метрополії подяковав ся і владыка Ніл Лущак, апостольскый адміністратор Мукачівской єпархії.

Рекордну суму подарило ся вызберати в місяці марец і в рамках збіркы, котру выголосила Пряшівска архієпархія. Вызберало ся майже 110 000 евр, а так само іде о історічно найвекшу суму, котра была везберана в храмах Пряшівской архієпархії.

Як потвердив про нашу редакцію Михал Павлишіновіч, говорця архієпархії, грошы бы так само мали іти про Мукачівску єпархію, но часть бы мала зістати на вытраты, котры суть повязаны з тым, же архієпархія і у своїх просторах притулила біженців з Україны.

О дефінітівнім розділіню вызбераных грошей уж мусить вырішыти апостольскый адміністратор Пряшівской архієпархії владыка Петро Руснак, котрый рядить архієпархію по абдікації метрополіты Йоана Бабяка.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА