Підпис безґрамотных

Фото: Найбівша на світі „україньска ковбаса“ у селі Мондер, Алберта, Канада.

Інформація з пресы. З радостьов вам даваме до відома, же в Канаді была офіціално зареґістрована Україньска фундація. Приреалізації своїх цілів замірять ся на співпрацу з донорами і шыршов російсков комунітов в Канаді і за граніцями, жебы міцніше была будована тота комуніта. Україньска фундація є основана про обще благо і на підтримку всокочіня, розвитку, досліджіня і штудія історії, літературы, уменя і традіцій Росіянів, котры пришли із Україны і Канадянів, котры мають коріня на Україні. Головнов метов Україньской фундації є підпора освітньой і верейно-проспішной діяльности Українців… На вопрос пресы, чом Україньска фундація говорить о співпраці зо шыроков російсков громадов в Канаді і бісідує раз о Українцях і раз о Росіянах, російскых діяч в Канаді одповів, же Українці суть частьов російской громады, дакотры їх діти ходять до російскых школ, дакотры ходять до російскых церьков вєдно з нима і властно, повічме собі рівно, добрі знаме, але то лем міджі нами, же Українці суть Малоросіяны. Видить ся вам дашто таке неможливе?

Тото, што бы было неможливе зробити Українцям, але ани жадному іншому народу, ся але може зробити Русинам. Подібна інформація перелетіла інтернетом того тыждня. Заснована была Лемківска фундація, котра буде співпрацовати з донорами і шыроков україньсков громадов в Канаді, жебы ся так посилнила тота, значіть україньска, громада. Інформація говорить о тім, же іде підтримовати културу і далшы области Укаїнців, котры пришли із Лемковины. Тым ся має всокотити русиньска – лемківска дідовизна. Із радостьов тото оголошать україньскый діяч, котрый нас пересвідчать, же Лемкы, то чать україньской громады в Канаді, тадь і вєдно до церькви ходять з Українцями. Богу дяковати!

Ціла радостно оголошена Лемківска фундація є лем далшов кульков, котров українізаторы пробують стрілити до чола Русинів. Тоты, котры о нас бісідують як о політічных Русинах, роблять найвеце брудной політікы і мають на то выпробованы, овірены методы, котры звучать барз добрі. Нашто бы заказовали, як комуністы, бісідовати о Русинах, Лемках? Навспак. Пошырюйме тоту назву серед нас. Але лем покля іде о то, же Русины то часть нас. Навспак бы ся їм то не любило.

Велике благо пришло про Русинів із Лемковины, же будуть мати фундацію, котра їм іде всокотити їх културу. Хто бы вже позерав на то, же такой в другім речіню суть тоты Русины – Лемкы, уж лем Українці з Лемковины? Хто бы вже позерав на то, же всокочіня лемківской културы є о тім, жебы записати до далшых досліджінь, книжок але головно до голов Русинів, же тота так красна култура, то часть україньской і они бы ся мали тішити і скакати аж під плафон, же того можуть быти частьов. Тадь што бы значіли самы о собі?

Лемківска фундація, котра в рамках головных цілів іде обертати ся на україньску громаду, котра Лемків называть Українцями з Лемковины, не є лемківсков. Є то лем далшый шаховый тяг, добрі передуманый, стратеґічный. Але тота шахова гра не є лемківсков, а україньсков. Кідь ся такым способом зохаблять баламутити Лемкы в Канаді, як ся зохабляють баламутити і Лемкы на Україні, пак їх култура не буде всокочена. Бо буде лем україньска култура і над тов свойов будуть годны зробити так акурат хрестик. А і кідь ку тому прийде, та і коло того най мерькують. Най зроблять лем єден. Бо як зроблять три, могли бы то українізаторы брати як согласный підпис безґрамотных Українців із Лемковины.

Петро Медвідь, Пряшів

(Статя была написана як коментарь „Вступне до контроли“ лемківского радіа lem.fm)

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА