Підкарпатьске воєводство помогло ПСК сумов 140 тісяч евр

По землетрясіню із октобра 2023-го року помагать Пряшівскому самосправному краю (ПСК) і Підкарпатьске воєводство в Польщі. Як інформовала Леа Леготьска з Одділіня комунікації ПСК, в тых днях парламент воєводства схвалив фінанчну поміч в сумі 140 тісяч евр.

Тоты грошы мають помочі одсторонити шкоды у Вігорлатьскім музею в Гуменнім, і в Піддукляньскім освітнім центрі в Свіднику. Іде о културны інштітуції, котры суть зряджованы крайом. Партнерскый реґіон схвалив про ПСК фінанції почас свого засіданя 26-го фебруара 2024-го року.

„Пряшівскый край по землетрясіню із 9-го октобра 2023-го року знайшов ся в тяжкій сітуації, а і дакілько місяців по ничівій катастрофі боює з наслідками. Зато ку каждій помочі, котра нам є адресована, приступаме з великым решпектом,“ повів підпредседа ПСК Ярослав Макатура почас понедількового засіданя згромаджіня Підкаркарпатьского воєводства і особной стрічі з маршалком Владиславом Ортилом.

„Дякуєме, же і Підкарпатьске воєводство придало ся ку тым, котры не лишыли нас самых, а помогли ку сохраніню нашого архітектонічного скарбу в Гуменнім, і културного центра в Свіднику. Тота поміч вказує, як міцне і важне є наше партнерство,“ повів Макатура.

У Вігорлатьскім музею в Гуменнім землетрясіня запричінило великы шкоды – попукали стіны внутрі і на вонкашніх фасадах. Єднакы проблемы має по землетрясіню і Піддукляньскый освітній центер у Свіднику, пуклины суть головно на частях, котры капчають стару і нову будову, пошкоджены были і ґарадічі в старім обєкті.

ПСК выділив першу фінанчну поміч на оправу великых матеріалных шкод на пріватнім і публічнім маєтку іщі в октобрі 2023-го року. Посередництвом крайской фундації перерозділив 136 тісяч евр меджі особы і родины з окресів, котры засягло землетрясіня.

В другій фазі дав фінанчны средства юрідічным субєктам, точніше селам, містам і церьквам. Было то у фебруарі того року, причім меджі 22 субєктів розділив 150 тісяч евр.