Підкарпатска Русь 70 років потім. Одданя Підкарпатской Руси до Совітского Союзу. Причынок до істориі чешского парляментаризму.

Під патронатом міністра культуры Чешской Республикы – Даниєля Германа і підпредсідателя Сойму Парламенту Чеськой републікы – Яна Бартошека, орґанізуваний буде семінар п.н. Підкарпатска Русь 70 років потім – одданя Підкарпатской Руси Совітскому Союзови. Причынок до істориі чешского парляментаризму.

Семінар зачне ся 5. листопада/новембра т.р. о 10.00 год. в парляменті Чешской Республикы в Празі, ул. Снємовні 4. В проґрамі передвиджено рефераты вызначных дослідників, істориків, архівістів і русиністів. Серед ріжных тем, являт ся м.ін. фана і герб Підкарпатской Руси, Підкарпатска Русь як част меджевоєнной Чехословациі (1919-1938), занятя Підкарпатской Руси Будапештом і мадярскє адмініструваня (1939-1944).

В головным бльоку вызвучат рефераты –

1. Причыны і повязаня, котры ся причынили до переданя Підкарпатской Руси Совітскому Союзови в 1945 році.
2. (Не)дипльоматычний бій о Підкарпатску Русь.
3. Тайна радийостация ВЛАДИСЛАВ і єй свідоцтва про заник Підкарпатской Руси.
4. Не єст смысельне протиставляти ся лупіжникам… Конец діянь чехословацкого уряду в Хусті початком 1945 р.
5. Рыхтуваня до перевзятя урядів на Підкарпатскій Руси.
6. Хронолоґія утрачыня Підкарпатской Руси в документах чехословацкого заграничного руху опору (1944-1945).
7. Прилучыня, фон і подіі прилучыня Підкарпатской Руси до Совітского Союзу в 1944 р.

Окрем доповіди в головным бльоку, будут выступліня присвячены грекокатолицкій церкви, шкільництву, совітизациі і украінізациі на Підкарпатскій Руси в сороковых роках ХХ ст. Валерий Падяк з Пряшівского Університету повіст о траґедиі русиньской нацийональной меншыны, выкликаной рішыньом про переданя Підкарпатской Руси Совітскому Союзови, а темом Аґаты Пілатовой буде ратифікация несправедливости.

На основі выголошеных рефератів буде ведена дискусия, котра мала бы дати одповід на вопросы – чом Чехословация оддала Підкарпатску Русь? Чом так легко підняла тото рішыня? Ци парлямент міг бы одвернути рішыня і привернути Підкарпатску Русь назад?

Радийо Руской Бурсы ЛЕМ.фм  достало запрошыня взяти участ в тій подіі.