Персіваль з найліпшом фольковом платньом за 2014 рік

Знаме уж кінцьовы результаты конкурсу Віртуальны Гушлі (Wirtualne Gęśle) на найліпшу фолькову платню выдану в 2014 р. По представліню 10 платен, котры вошли до фіналу (чым орґанізаторы емоцийні розгріли конкурсовы ансамблі і голосуючых інтернавтів), 12. мая дознали сме ся, же тогорічну едицию конкурсу выграл альбом ґрупы Персіваль (Percival) Слава ІІ: Пісні Східніх Славян, на котрій, окрем росийскых, украіньскых і білорускых пісен, находят ся тіж 3 лемківскы.

В другій конкурсовій катеґориі, в котрій голосуючы выберали найцікавшу окладинку, друга платня ансамблю Персіваль – Slavny Tur. Live in Wroclaw – тіж перемогла вшыткых конкурентів.

Конкурс Віртуальны Гушлі орґанізуваний єст од 2004 р. Стартували в ним лемківскы ансамблі, а і такы, котры охочо сігают по русиньску народну музыку. Два з них выгрывали конкурсы: Черемшына (в першій едициі за платню выдану в 2003 р.) і шыроко знана Оркєстра св. Миколая за платню Гуцульскы Музыкы (едиция за 2006 р.).

Ансамбль Персіваль был оснований в 2005 р. і од того часу фурт збільшат так чысло членів, як і хоснуваных, в тым ручні реконструуваных, інструментів. Дотепер выдал 5 альбомів, а неодолга ся вкаже наступний. Іх репертуар, на котрий складают ся народны і авторскы пісні, самы окрисляют як музыка Славян і Вікінґів.

Іх музыку чути тіж в найновшій, третій едициі фабулярной компутеровой гры Відьмин (The Witcher 3. Wild Hunt), котра проходит в світі фантази, сотвореным польскым писательом Анджейом Сапковскым. Єй світова премєра одбуде ся 19. мая 2015 р.