Першый етап ремонту за нами. Орґанізаторы акциі фурт апелюют о фінансову поміч

За нами успішно проведеный першый етап ремонту лемківского цмонтеря в Лабовій. Вольонтерам повело ся вратувати пару камінных памятників. Протягом парох дни зробили веце нич перше плянували. Але жебы іти допереду, потрібна єст фінансова поміч.

Ремонт лемківского цмонтеря в Лабовій то ініциятива, з котром офіцияльно вышол Лемківскій Ансамбль Пісні і Танця «Кычера» вєдно зо Стоваришыньом Маґурич при підтримці Стоваришыня Лемків і Музею Лемківской Культуры в Зындрановій. Як сме інформували, ремонт того єдного з найбільшых захованых давных цмонтерів на Лемковині єст в тым моменті необхідный. В тій ціли орґанізаторы разом з ґрупом вольонтерів зачали зберати потрібны фонды.

Першый етап зарахуваный до успішніх

Завдякы зобраным лем частинно грошам, в днях 2.-7. вересня/септембра  2019 р. проходил першый робочый табір. В комунікаті публикуваным на специяльно основаным в тій ціли фанпейджы в сіти Facebook, орґанізаторы пару дни по проведеных працах заявили, што змогли зробити більшу роботу як перше замірювали. Початково брано до увагы консервацию 4 або 5 памятників. Успішно в рамках реченого першого етапу вольонтеры поправили конструкциі, поклиіли, зміцнили і вычыстили аж 10 памятників, хоц не вшыткы необіхны працы были выконаны.

В роботах на цмонтери участ брали в більшости вольонтеры лемківского походжыня. Од технічной страны табором завідувал презес Стоваришыня Маґурич, Шымон Моджеєвскій. Через тых пару дни, участникы робили по 12-13 годинн на ден.

«То вынятковый цмонтір. В кряках однаходиме штораз то новы памятникы» – бесідує єден з вольонтерів, Павел Ханас. «Робота з каждым дньом приносила ефекты, што давало штораз веце радости і задоволіня. Лабівскій цмонтір то вынятковый цмонтір. Робота на ним то тіж чудова метода на психічный одпочынок од міста, штоденной роботы, стресів, але тіж нагода, жебы познавати свою культуру, історию народу. З Лабовой і околиц походят вызначны Лемкы. В рамках табору мож познати цікавых люди. Робили з нами як вольонтеры інформатикы, фінансісты, копальникы ци будовлянці» – додає.

Орґанізаторы за підпору в першым етапі хочут подякувати так само війтови ґміны Лабова Марті Слабы, шолтысови Лабовой Янови Шмыді, настоятельови місцевой римокатолицкой парохіі о. Анджейови Фікови і інчым, котры фізично і словом підтримували в тых днях вольонтерів.

Апель о поміч дале актуальный

Першый етап орґанізаторы закінчыли на дефіциті. Зато фурт апелюют о фінансову підпору ремонту лемківского цмонтеря в Лабовій. Початково плянували, што першы роботы будут выконаны за зобрану суму 5 тис. зл. В тій ціли выстартувала інтернетова збірка грошы.

Іщы перше вольонтеры вели продай лемківскых выдавництв м.ін. на Лемківскій Ватрі в Михалові. Грошы отриманы з продажы книжок так само пішли на орґанізацию першой части ремонту. На сайті www.zrzutka.pl находит ся одкрыта збірка грошы, на котру жертвувати годен каждый. Цілковитый кошт ремонту вшыткых заплянуваных памятників то приблизно 25 тис. зл. Як уж было спомятуто, на першый етап орґанізаторы потрібували бл. 5 тис. зл. Тота сума не была на жаль зобрана, так приступили до ремонту лем з частином потрібных грошы. На днес зобрана квота то невельо понад 2,5 тис. зл.

Як поінформували нас вольонтеры, другій етап конечно хотіли бы зорґанізувати на яр будучого рока. Ци ся тото поведе, по кус залежыт од нашой фінансовой помочы, до чого заохочаме.