Перша етапа рештаврованя цінного іконостасу закінчена

Вігорлатьскый музей в Гуменнім закінчів першу етапу рештаврованя іконостасу із деревяной Церькви святого Михаіла Архістратига, яка была збудована у 1764-ім році в Новоселіці, Сниньского окресу, і в 1974-ім році быв храм перенесеный як першый обєкт до Експозіції народной архітектуры і бываня (сканзену) Вігорлатьского музея.

Як за музей інформовала Івана Стракошова, іконостас першый раз рештавровав ся при перенесіню храму до Гуменного. Впливом часу і експонованя є моментално пошкоджена вытварна і архітектонічна часть.

Цільом першой етапы реалізації проєкту, котра є закінчена, было рештаврованя трьох із штирьох ікон головного шору іконостаса – іконы святого Николая, Богородіці і Хріста, вєдно з їх архітектуров.

На окремых іконах была упевнена поліхромія, наслідовало очіщіня мальбы од лаків, старшых ретушів і одстороніня старшых ґітів. Далше ліпили ся розділены части підложкы і архітектуры, робила ся петріфікація і доповніня бракуючіх деревяных елементів. Потім были доґітованы части, де браковали малярьскы верствы i поліхромії, выконало ся поліментованя, і так ся наношало золото і стрібро.

На кінцю іконы перешли оптічным сціліньом ретушованьом і фіналным лакованьом. Тісно перед початком тогорічной турістічной сезоны были іконы наіншталованы на своє місце в рамках іконостасу.

Першу фазу рештаврованя цінного іконостасу з Новоселіці выконовала Людмила Зозулякова у своїм ательєрі в Кошыцях.

Фото: Архів Вігорлатьского музея.