Перогы, кєселиця, фізола і горох – вшытко тото а іщы більше на Велийній Стрічы в Рускій Бурсі

Уж в найблизшу пятницю, 27. грудня/децембра, згідні з бурсяном традицийом, вшыткы разом сядут до велийного стола.

Стріча зачне ся о 16.00 годині в будинку Руской Бурсы, але як што рока мож прити скорше, жебы разом рыхтувати велийны стравы при звуках коляд. В тым часі молодшы будут мочы прикрашати яличку і робити святочны прикрасы, котры пак буде мож обзерати в цілій бурсі.

В часі тогорічной стрічы выступлят дві ґрупы ансамблю Терочка, якій діє при Стоваришыню «Руска Бурса» в Ґорлицях, котры запрезентуют богатый колядничый репертуар. Буде можна і послухати прелекциі про лемківскы різдвяны звыкы. Презентувати іх будут ученикы середніх шкіл, якым допомагала ся прирыхтувати учытелька лемківского языка Моніка Тылявска.

Велийна Стріча то найліпша нагода до передсвяточной бесіды та спільного колядуваня. Вказує, як богата єст святочна традиция Лемків і як дуже можеме ся іщы о ній дознати, окрем того дає можливіст спільні празднувати і радувати ся з надходячых різдвяных свят.

В імени орґанізаторів – сердечні просиме.