«Пересвітліня» з Лемковины

Од 27. вересня/септембра до 23. жолтня/октобра в ґалериі «na6» в Ґливицях мож видіти выставу фотоґрафій Алициі Пшыбышовской пн. «Пересвітліня». Є то особиста візия Лемковины фотоґрафкы.

Фотоґрамы роблены Пшыбышовском сут зложеныма композициями з вельоелементовом наррацийом. На єдній знимці мож видіти аж і пару обєктів – сут то головні сакральны обєкты, такы як церкви, костелы, кресты, але тіж краєвиды. Знимкы сут чорно-білы.

Цілю фотоґрафкы є вказати Низкій Бескід подля того, як она го одберат і чує, і передати енерґію місц, люди, традиций і символів. «Фотоґрафуваня то для ня не математична задача, котру мож реализувати подля формулы. То досвдічыня, котре ся чує. То процес, якій тырват роками, черговы досвідчыня, розвиток, стрічы і бесіды з людми. Тото вшытко прібую представити в циклю фотоґрафій Пересвітліня» – оповідат фотоґрафка. «Так чую Низкій Бескід. (…) В фотоґрафіі вшытко має якісе значыня, так як кажде слово в книжці. Неє повинности – сут лем можливости» – продолжат Пшыбышовска.

Авторка походит в Нового Санча, де фурт жыє і одкале бере інспірациі до творчости. Студентка Академіі Красных Штук во Вроцлаві. Членкыня Фотоклюбу Польской Республикы – Стоваришыня Творців од 2016 рока. Занимат ся концептуальном фотоґрафійом, шыроко понятым краєвидом, социйолоґічном і подорожничом фотоґрафійом. Пшыбышовска є авторком 15 індивідуальных і парудесятьох колективных выстав. Досвідчыня здобыте протягом років вказує вчас ріжного рода дискусийных панелів, стріч, варштатів та як выкладовчыня. Єст лавреатком державных і медженародных фотоґрафічных салонів, на котрых здобыла імпонуюче чысло, бо веце як 90, нагорід.

Фот. за: foto-info.pl