Перемышльскій владыка в Ґладышові. Посвятил новый розпис в грекокатолицкій церкви

Неділя 6. листопада/новембра 2022 р. была для вірных грекокатолицкой парохіі в Ґладышові дньом, коли владыка Євген торжественно посвятил новый розпис в середині храму.

Архієрейска літургія была повязана з офіцияльным завершыньом малярскых прац, котры – мож речы – были докінчены аж по більше як семох декадах по выгнаню. Припомнути бо треба, што памяткову грекокатолицку церков Вознесіня Господнього в Ґладышові вірны побудували на коротко до ІІ світовой войны і не встигли докінчыти єй інтерєру, што перервала траґічна Акция «Вісла».

На запрошыня пароха о. Ярослава Чухты і вірных ґладышівской церкви, зрыхтуваный розпис посвятил архієпископ Євген (Попович), митрополита перемышльско-варшавскій УГКЦ в Польщы. Присутны были і другы священникы з поблизкых парохій входячых до краківско-ґорлицкого деканату, в тым бывшый парох Ґладышова о. Павел Сивец, за котрого в 2006 р. был вставленый в церкви іконостас. Вєдно з вірныма молил ся і настоятель римокатолицкой парохіі в Ґладышові (римокатоликы хоснуют церков для потреб свойой літургіі).

Проєкт фіґурально-орнаментальной поліхроміі зробили Алина Грубець і Іван Панас, студенты Выділу Сакрального Малярства Львівской Державной Академіі Красных Штук. Розпис был реализуваный як дипломова праца під оком др. габ. Кости Марковича, на котрый позволіня дали воєвідскы консерваторскы власти.

Хоц парохія в Ґладышові чыслит лем десят родин, то і так є єдном з більшых грекокатолицкых парохій в тій части Лемковины. З огляду на великы кошты повязаны з выконаньом розпису, перед даякым часом вірны зорґанізували інтернетову збірку фондів.

Грекокатолицкій храм Вознесіня Господнього в Ґладышові был побудуваный в роках 1938-1939. Церков поставили гуцульскы теслі, прото презентує она рідко стрічаный на Лемковині стиль сакрального будівництва, а выконана поліхромія вписує ся в архітектонічну форму будівлі.

фот. cerkiew.org