Переможці плебісциту Краківской Ґазеты

До пізного вечера, в пятницю, 2. лютого/фебруара 2018 р. тырвал плебісцит Краківской Ґазеты, в рамках котрого выберано Персоны 2017 рока. Про ґорлицкій повіт были зорґанізуваны штырі катеґориі, в котрых номінуваны были м.ін. особы повязаны з лемківскым середовиском. О. Аркадий Баранчук і Богдан Малеша перемогли в поєдных катеґориях. 

Припомнийме, што православний священник – о. Аркадий Баранчук, якій веде Православний Осередок Милосердя «Елеос» в Ґладышові, был номінуваний в катеґориі Соспільна і благодійна діяльніст за розвиток і розбудову осередка «Елеос». До послідньой хвилі не мож было быти певным, што парох Ґладышова, Реґєтова, Ждыні і Конечной переможе в своій катеґориі. Міцным конкурентом был Томаш Добек, спілвластитель порталю gorliczanin.pl, номінуваний за зорґанізуваня благодійной акциі для непольносправной родины з Корчыны. Конец-кінцьом о. Баранчук выграл, отримуючы 2087 голосів. Т. Добек отримал 1747 голосів. Вартат спомнути, што чысло 2087, чысло голосів на о. Баранчука, было найвекшым спосеред вшыткых катеґорий. 

Другым участником голосуваня звязаным міцно з лемківском музыком был Богдан Малеша – м.ін. гудак лемківскых і польскых ансамблів. Музык был номінуваний в катеґориі Культура за орґанізацию собітковой стрічы і Свята Комперя. Переміг він в своій катеґориі, отримуючы 410 голосів. 

Третьом з осіб беручых участ в плебісциті, яка діє і на ниві лемківской культуры, был Роман Корбич. Подібні як Малеша, был він номінуваний за Культуру. Його кандидатуру проголошено за зорґанізуваня концерту з нагоды 20-літя діяльности Лемківского Фолькового Ансамблю «Серенча» та пошырюваня культуры на обшыри ґорлицкой землі, за справом веденых ним дутых оркєстр, мажореток і народного ансамблю. Лемківскій гудак нашол ся в плебісциті на 4. місци. 

Кінцьовий список голосів мож видіти за тым мотузком. Ґратулюєме!