Передмаланковий «Говорить Пряшів» – пятниця, 20.00 год.

Будут фанфары. Можете быти спокійны. Каждий, хто сяде за стіл або од него стане гуляти – привитат Новий Рік як ся належыт. З нами тіж сте годны тото пережыти. Старчыт, што си влучыте радийо і веселой музыкы выслухате. 

Про тых ґрамотных, якы цікавлят ся культуром, історийом і інчыма поучытельныма справами, маме на днес, од все і по все, премєровий проґрам од Руснаків з Пряшівской Руси. Добрі мати камаратів. Товды мож крутити бізнесы, а в нашым середовиску очывидно етнобізнесы. Хоц і так диспонентом тых радийовых коншахтів будут нашы вірны слухаче. 

Но то переходиме до мерітум. В Нашых Целебритах про євангелицкого єґомостя, роботу котрого своі не принимали, ани не розуміли, а до того спалили храм, в котрым служыл. Бесіда про Йонаша Заборского, якій нашол камаратів і зрозумліня серед русиньскых Будителів. 

Приносиме актуалны інформації з русиньского середовиска і нелем з нього. З нашыма справами будете все актуално інформованы о найважнішых подіях і з Културным калеідоскопом вам не втече жадна културно-сполоченьска акція у вашім реґіоні.