Перед 70. річницьом Акциі Вісла в Ріпках стане таблиця присвячена выгнаным Лемкам та вбитым Жыдам і Ромам

Як заявлят сайт радия tok.fm, заран (5.11) в русиньскым селі Ріпкы на Лемковині одбуде ся посвячыня памяткового каменя з таблицьом, присвяченом бывшым, автохтонічным жытелям села. Памятна таблиця буде упамятніньом выгнаных злочыном Акциі Вісла – Лемків, жыючой до ІІ Світовой Войны ромской родины, та двох родин Жыдів, котры вєдно з сусідами Циґанами были вбиты гітлерівскыма оправцями.

Допис поміщений на сайті tok.fm спорядил польскій професор медицины і педаґоґікы – проф. Анджей Ячевскі, котрий до Ріпок трафил в 60. роках ХХ ст. Як пише в рамках свойого блоґа, печатаного на сайті спомненой редакциі: […] колиси было то село сильно заселене Лемками. Але коли єм гев пришол в 1960 році, жебы зрыхтувати зимовиско для скаутів, мешкали ту лем дві родины вынятково впертых Лемків. З выселеных в рамках Акциі Вісла в 1947 році повернули гев в жолтни/октобрі 1956 рока як єдины. Чом? Прото, же полюбили красу гевсого місця. Розумію тото – преця неодолга сам єм тому пристал. 

Памятник бывшым жытелям Ріпок стане на місцевым цмонтери, на котрым доднес захоронило ся пару забытковых нагробків, попри місци, де колиси стояла прекрасна деревяна церков Рождества Пресвятой Богородиці з 1801 рока, перенесена, коли зачала попадати в недостаток, до скансену в Саноку. Днес цмонтір находит ся під опіком православной парафіі Покровы Пресвятой Богородиці в Ганчовій. Таблицю посвятит заран місцевий православний священник, котрий несе опіку над Ріпчанами і цмонтерьом. Вшыткых, котры коли-небуд были в Ріпках, здравлю – і прошу: спомнийнте на тото незвычайне місце і задуймайте ся хоц на хвилю над непростом, і часом траґічном історийом. Ріпкы не сут гев вынятком – так досвідченых сел было барз вельо… – пише дальше проф. Ячевскі.

Факт одкрытя памятника бывшым жытелям села як найбарже заслугує на похвалу. На жаль, в тым році інформували сме про акт нетолераниці і ксенофобіі взглядом Лемків, котрых навза села є писана тіж і в лемківскым языку: Ropki – Ріпкы. Щестьом, по інтервенциі в ґміні Устя Рускє єдной з активісток Стоваришыня Лемківской Молодежы ЧУГА в Польщы та спілпрацівничок нашого радия – таблицю повело ся вычыстити. В липци/юлию селькій цмонтір был выпрятаний лемківском молодежом, котра путувала з православным поломництвом на Святу Гору Явір.