Павел Ксенич – лемківскій писменник молодого поколіня

14. січня проходит річниця уродин Павла Ксенича – лемківского писменника молодого поколіня.

Вродил ся Павел Ксенич 14. січня 1977 в Шпротаві на Нижнім Шлеску, де скінчыл основну і середню школу, пак в роках 1996-2001 студиювал право на Вроцлавскым Університеті. Його маґістерска розправа тычыла темы выселіня Русинів. През рік был на стипендиі на юридычным факультеті Ратизбоньского Університету, де пізнійше зачал подипломовы студиі.

Літературний дебют П. Ксенича мал місце уж в 1999 році на странах Загороды, до опубликувано польскоязычну гумореску Z humorem o Łemkach w pytaniach i odpowiedziach. Дальшы творы друкуваны были в Бесіді. Павел Ксенич был тіж гостьом єдной з Лемківскых Творчых Осени, орґанізуваных Стоваришыньом Лемків і Стоваришыньом Руска Бурса.

Творы Ксеинча характеризуют языковий та ситуацийний гумор і вказуют лемківску реальніст в кривым дзеркалі, іронічні обнимаючы поважны проблемы консерватывных Лемків – през сміх примушаючы до рефлексиі.

(фот. przegladprawoslawny.pl)