В днях 28-го аж 30-го апріля 2023-го року быв на своїй апостольскій пути в Мадярьску Папа римскый Франціск. Вселеньскый Архієрей стрітив ся окрім іншого з найвысшыма представителями країны – презідентков Каталін Новаковов ці премєром Віктором Орбаном.
В суботу, другый день навщівы Мадярьска, в дополідняйшых годинах Папа по стрічі з україньскыма біженцями і убогыма кліентами харіты, яка одбыла ся в Храмі святой Єлизаветы Угорьской в Будапешті, пішов до недалекой Ґрекокатолицькой церькви Покровы Пресвятой Богородіці, де проходила курта стріча з ґрекокатоликами.
Дыхаме двома плюцами
В церькви торжество зачало іщі перед приходом Папы. Віруючі, котры ся там зышли, вєдно із владыками а священиками молили ся Акафіст ку Пресвятій Богородіці, і то перед Чудотворнов Іконов Маріяповчаньской Богородіці.
Акафіст быв перерваный приходом Папы Франціска, котрого при дверях окрім домашнього пароха Шандора Яцка привітав архієпікоп і митрополіта гадудороґскый Філіп Кочіш. Пак вєдно ішли перед іконостас, де быв про Папу Франціска приготовленый седес перед іконостасом. Там го поздоровили і владыка Атаназ Орос, мішколцьскый єпарха, ніредьгазькый єпарха владыка Авел Сочка, і емерітный владыка Сілард Керестеш.
„Од Папы Йоана Павла ІІ. сьме ся навчіли важну правду, же Хрістова Церьков дыхать двома плюцами, духом Востока і духом Западу, котры вєдно ожывлюють містічне Тіло,“ повів у приговорі митрополіта Філіп.
„Про нас ґрекокатоликів є приналежность до Католицькой церькви вынятково важнов, і много сьме про ню вытерпіли. Нашы мученици вмерли нелем за свою хрістіаньску віру, але передовшыткым за вірность Католицькій церькви. Намісто того, жебы ся підпорядковали діктату комуністічного насилства, зістали вірны Католицькій церькви і вмерли за ню,“ продовжовав голова Ґрекокатолицькой церькви в Мадярьску.
„Коло себе стоять два храмы, коло себе жыють дві комуніты, римокатолицька і ґрекокатолицька. Днешньов навщівов, кедь до нашого скормного восточного храму пришла голова Церькви, дістали сьме величезне потверджіня, же і мы сьме рівноцінныма членами Католицькой церькви. Обіцяме, же будеме глядати і оголошати Хріста, будеме носителями і будователями єдности,“ зазвучало з уст митрополіты на стрічі з Папом Франціском.
Папа взяв на ся епітрахіл і дістав чоткы
Мадярьскы ґрекокатолици про Папу приготовили дакілько дарів. Меджі нима была ікона, ці золоты-білы ручні выроблены чоткы, котры хоснують ся у восточній церькви при Ісусовій молитві. На руку му їх навлік митрополіта Філіп.
По переданю дарів владыка Авел дав до рукы Папови єпіскопскый крест і митрополіта Філіп му дав єпітрахіл, сімбол восточного священства. Вєдно помолили ся єктенію за мір, по ній Вселеньскый Архієрей дав своє благословліня участным по латиньскы, і наконець ся ґрекокатолици з Папом попрощали пасхалным тропарьом. Пак продовжовали в молитві Акафісту ку Пресвятій Богородіці.
Спомянув і владыку Ромжу
В тот самый день проходила і стріча молодежи з Папом Франціском. Як інформовав владыка Мілан Лах, помічный єпіскоп Братіславской єпархії, Папа на тій стрічі повзбудив у своїм приговорі молодых, жебы подля взору блаженого єпіскопа мученика Теодора Ромжы, „не жыли сьме лем напів про Хріста.“
Блаженый священомученик Теодор быв мукачовскым єпіскопом русиньского походжіня, котрый став жертвов комуністічных репресій проти Ґрекокатолицькой церькви.
Ґрекокатолицька церьков в Мадярьску рахує понад 300 тісяч віруючіх. Є то митрополітна церьков свого права, котра поступно формовала ся одділіньом той теріторії од Мукачовской ґрекокатолицькой єпархії.
За митрополітну церьков была выголошена Папом Франціском у 2015-ім році, творять єй Гайдудороґска архієпархія і дві єпархії з центрами в Ніредьгазі і Мішколці.
Фото: Görögkatolikus Médiaközpont.
ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА