Папа поблагословив Ікону Пресвятой родины з Джублика

На авдієнції, котра проходила у Ватікані 16-го юна 2021-го року, была участна і делеґація з Мукачівской ґрекокатолицькой єпархії, котру вів владыка Ніл Лущак, апостольскый адміністратор єпархії.

Як інформовав портал Vatican News, на кінцю стрічі з путниками Папа римскый Франціск привітав ся з владыком Нілом, котрому поціловав Панаґію, і поблагословив Ікону Пресвятой родины з Джублика, котру там путници з Мукачівской єпархії принесли.

Джублик є ґрекокатолицьке путницьке місце коло села Нижнє Болотне (до року 1947 Нижній Шард, Іршавского району). Там ся у 2002-ім році коло жрідла зъявила двом дівчаткам – Альоні Куруць і Маріяні Кобаль, Пречіста Діва. Дівчата далше бісідовали, же на богослужіня часто приходить ціла Пресвята родина – Ісус, Марія і Йосиф.

Такой у 2002-ім році ся в Джублику одправляла перша літурґія, яку служыв єпіскоп Іван Марґітич. В децембрі того самого року прияв візіонарькы на авдієнції Папа римскый Йоан Павел ІІ., котрый їх поблагословив.

В році 2004 владыка Мілан Шашік, котрый быв у тім часі апостольскым адміністратором Мукачівской єпархії, засновав в Джублику монашу общіну Собору Пресвятой Богородіці, яка ділить ся на два монастырі – про мужів і про жены. Архімандрітом є правлячій єпарха мукачівскый.

На місці, де одбыли ся зъявіня, была збудована і літня одпустова Церьков Непорочного Зачатя Пречістой Дівы Марії.

Жрідло фотоґрафій: Vatican News.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА