В послідню неділю, 7. мая т.р., в звязку з 70. річницьом траґічной акциі «Вісла» в єдным з православных храмів Ню Йорка была служена панихіда за жертвы выгнаня. Богослужыня зачали ся недільном Святом Літургійом в церкви Преображыня Господнього, яка находит ся в Бруклині. По ній парох Преображеньского собору – о. Вячеслав Кравчук, одслужыл панихіду. В слові до вірных священник напомнул о Русинах, якы потерпіли вчас выгнаня, а і шырше пояснил тему злочынной акциі «Вісла».
На богослужынях, окрем вірных з Ню Йорка, присутны были родакы з Ню Джерзі та Йонкресу. Днешніма прихожанами храму Преображыня Господнього сут головно еміґранты з Польщы, в тым чыслі Лемкы. Парохія была ериґувана за справом еміґрантів з Галичыны, якы перенесли ся на америцкій континент на переломі ХІХ і ХХ ст. По панихіді, за традицийом парохій за океаном, прошол спільний почастунок.
Церков Преображыня Господнього в Бруклині была побудувана в роках 1916-1921. Парохія находит ся в юрисдикциі деканату Ню Йорк Місто, єпархіі Ню Йорка і Ню Джерзі Православной Церкви в Америці (анґ. OCA – Orthodox Church in America). В 30. роках ХХ ст. храм был воздвыжений до ранґы собору.
![](https://www.lem.fm/wp-content/uploads/2017/05/cerkow_ny-238x300.jpg)