Памятник нашым героям

Памятникы ставляме часто з той причыны, бо хочеме оддати чест дакому або дакым подіям. Памятникы можут ділити сакрум і профанум. Годны быти великы і малы, годны своім змістом выкликувати пошану, але годны тіж бурити другых. Вкінци годны быти высловліньом того, што не все очывидне.

Памятником, котрый на долгы рокы зъєднал Лемків, котрый як першый (!) был поставленый по выселінях через самых Лемків, якы змогли на ним выписати лемківскоязычну інскрипцию, был устяньскій памятник лемківскых добровольців і борців за свободу вчас ІІ світовой войны з Лемковины.

Нон памятник стоіт доднес – в центрі Устя Руского, хоц не так давно казали змінити зміст поміщеной на ним таблиці, бо разил днешніх правителів Польской Республикы.

Стоіт гын, як бы мал стояти од початку світа, як бы был гын од все. Лем не каждый знає, што його істория доднес не была докінця досліджена. Може зато так захоплює, так чудує і выкликує море звідань, на котры, на жаль, штораз меньше люди годно дати нам одповіди.

Был 22. липця/юлия 1963 р. Товды в центрі Устя згромадили ся люде, што пришли на торжество. Шыроко зышол ся нарід з Лемковины, з выгнаня, Америкы, Совітского Союза, Чехословациі. Днес знаме, што не была то абы-яка подія.

Было то досправдове торжество, якого ініцияторами были Михал Доньскій, Павел Стефановскій і інчы лемківскы діячы тамтой добы, в тым – так як тот першый, комуністичны партизанты з Лемковины.

Вельостінник, камін, што свойом мертвом душом оддал першыраз пошану народови, якій іщы перед шістнадецтьома роками пращал слезами тоту землю. Зробил го свойом артистичном руком Григорий Пецух, родак з Фльоринкы.

Устяньскє місце памяти добровольців стояло і стояло, а нихто му не заваджал. Вкінци зазріли гын новы власти, што ім зачали вадити памятникы, якы медже інчыма стояли в чест вшыткых тых, што тіж бороли ся за свободу (пак ся вказало, што не докінця свою, бо кус на червено фарблену).

Павел Стефановскій, якій помер кінцьом марця 2021 р., был остатнім з тых, што іх увічнено на знимці горі. Памятам, як при справі проб зрушыня памятника (што пак на щестя довело лем до зміны змісту таблиці) з покійным уж так само Богданом Ґамбальом розправлял єм о тым, якє значыня мало одкрытя того памятника в 1963 р. Богдан товды звернул мою увагу на знимку горі, а точнійше на тото, жебы зверифікувати особы на ній. Повіл мі, жебы-м обернул ся за Павлом Стефановскым, якій як єдиный іщы товды был серед жывых.

Подзвонил єм до Білянкы. Домовили сме ся з паном Павлом, же вышлю ім копію знимкы листом, а пак за даякій час зас подзвоню, жебы побесідувати о особах, якы на ній сут. Так і потім єм зробил, хоц памятам, же Павел Стефановскій не знал повісти, кым сут тоты люде, якы на нашій знимці не были доднес розшыфруваны. За Богданом Ґамбальом з припущыньом ствердил, же могли то быти політрукы. Хоц я доднес не єм переконаный, же так радо бы стояли посеред нашых лідерів. Знатя, што окрем увічненых на знимці в Устю были і дальшы знаны – проф. Роман Райнфус і Федір Ґоч.

При темі лем спомну, што заінтересуваня в Богдана Ґамбаля сесом знимком, но а і шырше устяньскым памятником, а пак і моє свого рода захопліня том справом, взяло ся быти може з того, што Богданів няньо был в 1963 р. в Устю Рускым, коли вельостінник был торжественно одкрываный. Заховала ся і інча фотоґрафія, на якій увічнено памятник і люди в тот памятный сонечный ден. Автором той знимкы был Владимір Ґамбаль, родом з Чарной при Устю, няньо Богдана.

Долов о тым, як то было перед тым, нич памятник станул такым, як го днес видиме. Статя была напечатана в еміґрантскым «Карпаторусскым Календари Лемко-Союза» на 1961 р., якій сопоставил Миколай Цисляк (видиме го на фотоґрафіі). Сама статя не мат підписаного автора, хоц мож припущати, што єст ним редактор Цисляк. Реляцию з самого одкрытя припомнул нам перед парома роками не хто інчый, як сам Богдан Ґамбаль (мож єй гев чытати).

ПАМЯТНИК НАШЫМ ГЕРОЯМ

Минувшого 1960 року в праздник 1 мая в центральном селі Западной Лемковщины Устью Русском был заложеный краєугольный камень под памятник борцам и героям, а именно под памятник лемковскым партизанам боровшымся и отдавшым свои жизни с німецкыми гитлеровскыми оккупантами. Сама идея будовы такого памятника, як и подбор містности для него сут идеальны.

На памятник лемковскы партизаны собі заслужили. Они завзято, не зважаючи на нич, боролися за свободу свого народа и свого краю. Так хоц тым памятником слідує отдати им честь, бо всі цивилизованы народы почитают своих пионеров, своих передовых борцов и защитников народа и будуют достойны их славі памятникы. Памятникы не лем украшают площади, скверы и паркы, они вічно напоминают живущому народу на прошле, на посвяту тых передовых людей, котры в давных и трудных условиях боролися, штобы приблизити счастливе будуще для всіх.

Місцевость для памятника, мы тоже назвали идеальном. Устье Русске лежит на роздорожу во всі стороны. С сусідными селами, як узлами, оно связано добрыми дорогами. С давен-давна Устье Русске славилося свойом промышленностьом и торгами, в результаті чого в центрі села остался рынок, широка площа, помимо того, што слава ярмарков на все минулася. Для памятника, як раз подобраный тот центральный кусник земли, сердце центрального села Западной Лемковщины.

Дня 1 мая 1960 року тут в том центрі села, при головной участи здравствующого партизанского командира Михаила Донского, торжественно был вкопаный камень, на місци котрого должен вырости достойный памятник партизанам. Торжество заложения памятника отбылося при многолюдной участи жителей самого села Устья Русского, як и при участи делегаций из сусідных лемковскых сел и представителей повітовых властей Горлицкого повіта. Из Народного Дома в Устью Русском вырушил торжественный поход с вінками и написами к пляцу заложения краєугольного каменя, супровождаємый оркестром. На пляцу будущого памятника уж ждали выстроєно убраны в пестрий народный лемковский крой члены Лемковского Ансамбля Співу и Танцу из Білянкы под руководством Павла Стефановского. Хор, кромі співу «Жертвой упали», проспівал ряд другых патриотичных пісень лемковскых и польскых. Сам оставшийся в живых ветеран партизанов, Михаил Донский, выголосил достойну того памятного дня бесіду и зарыл краєугольный камень в землю, котрый сейчас же был накрытый цвітами, лентами и вінками.

Но памятник ище не побудуваный. Комитет памятника объявил конкурс и запросил артистов, архитекторов и різьбаров до подготовкы проєкта. Скоро такий проєкт буде готовый и одобреный, комитет возве население Лемковщины и цілой Польшы на сбор жертв для будовы памятника. И всі прочи лемкы так на переселению в Совітском Союзі, як и на емиграции сущы одозвутся с щирыми жертвами для воздвигнения того славного памятника нашым героям.

Надіємеся, што на открытие такого памятника зыйдутся лемкы не лем из всьой Лемковской территории, но што из Совітского Союза, Соєдиненных Штатов и Канады придут отдільны делегации, штобы быти свідками при отданию вічной чести передовым героям лемковского народа.