Грекокатолицка церков в Ґладышові буде розписана. Потрібна наша підпора

Хоц деревяна грекокатолицка церков Вознесіня Господнього в Ґладышові была побудувана на пару років перед выселінями з 1944-1947 рр., аж тепер отримат внутрішній розпис.

Іщы скорше выконаня поліхроміі перервала ІІ світова война. Фактично церков до Акциі «Вісла» не была скінчена, кєд же вірны не встигли поставити іконостас, ани прикрасити храм поліхромійом.

Потрібна наша підпора

Проєкт внутрішнього розпису ґладышівской церкви был зробленый в 2019 р. Має быти зреализуваный в недолгым часі, кєд же іконы, якы будут замонтуваны під головном баньом, сут уж такой в цілости зрыхтуваны.

Грекокатолицка парохія в Ґладышові чыслит лем десят родин. Кошты выконаня розпису перебільшают фінансовы можливости той невеликой громады. Зато тіж, перед парома днями, выстартувала інтернетова збірка фондів на довершыня проєкту, так жебы храм уж неодолга міг погордити ся новом поліхромійом.

Парохіяне потрібуют 20 тис. зл – колекта ведена єст на сайті zrzutka.pl, де каждый може вплатити свій добровільный даток. Як інформує парохія, назвиска жертводавців мают быти експонуваны на памятковій таблици.

Проєкт фіґурально-орнаментальной поліхроміі зробили Алина Грубець і Іван Панас, студенты Выділу Сакрального Малярства Львівской Державной Академіі Красных Штук. Проєкт є реализуваный як дипломова праца під оком др. габ. Кости Марковича, на котрый позволіня дали воєвідскы консерваторскы власти.

Розпис в своім стилю має навязувати до естетикы, в котрій был твореный інтерєр храмів в 20. і 30. роках ХХ ст. Зобразуваня святых розмалювано на великых дощках о вымірах 250 на 125 цм. В сумі артисты розмалювали 24 штукы зображынь, якы по получыню будут творити ціліст. Розпис має быти замонтуваный під повалом головной бані церкви.

Церков Вознесіня Господнього

Грекокатолицкій храм Вознесіня Господнього в Ґладышові был побудуваный в 1938-1939 рр. Церков поставили гуцульскы теслі, прото презентує она рідко стрічаный стиль сакрального будівництва на Лемковины. Свойом ориґінальністю притігат чысленных туристів.

Попередня ґладышівска церкoв св. Михала Архангела згоріла в 1914 р., стояла она в місци теперішнього цмонтеря. Такой через дві декады вірны не здоляли одбудувати старого храму, зато в тым періоді молили ся они в каплици св. Йоана Крестителя, яка актуально належыт православным вірным. Аж кінцьом 30. років ХХ ст. повело ся побудувати нову грекокатолицку церков.

Скорый прихід ІІ світовой войны, а пак цілковите знищыня Лемковины спричынене проведеном Акцийом «Вісла», довело до того, што церков фінальні зачала быти хоснувана римокатолицкыма осадниками в селі. По поворотах части лемківскых жытелів під конец 50. років ХХ ст. в церкви были нереґулярно служены грекокатолицкы богослужыня.

До 1985 р. церков хоснувана была выключно місцевом римокатолицком громадом. Аж в 1999 р. святыня офіцияльно повернула до первістных властителів і молят ся в ней католикы обох обрядів. В 2006 р. в церкви был заінсталюваный іконостас, а тепер як раз плянуваный є монтаж розпису.