«Памяти Нашых Бурсаків» – великій ґаля концерт в Ґорлицях

Як важне значыня має памят в нашым жытю, найліпше вказує лемківска істория. Без памяти, продолжаня і утырваляня выпрацуваных правил і канонів быти може уж бы не было того, што днес маме.

Наша спільнотова памят єднат нас і коло памяти сут люде, якым вельо завдячаме. Памят о тых, што одродили штоси, жебы дальшы могли з того черпати.

І так свою громадску памят мают ґорлицкы бурсакы. В 2021 р. споминаме 30. річницю реакцивациі Стоваришыня «Руска Бурса» в Ґорлицях і 10. річницю основаня першого лемківского радия ЛЕМ.фм. Точны даты тых річниц выпали 1. червця/юнія.

Но, бурсакы уж неодолга припомянут не лем тоты подіі, але предовшыткым люди, што іх ініциювали. 9. вересня/септембра на ґорлицкым рынку одбуде ся великій ґаля концерт пн. «Памяти Нашых Бурсаків – в 30. річницю реактивациі Стоваришыня Руска Бурса».

Выйти до Ґорличан

Подія зачне ся о 16.00 год. в центрі Ґорлиц – на рынку. Од самого початку задумом бурсаків было, жебы выйти до Ґорличан і вказати не лем тото, што в місті од більше як стох років діє Руска Бурса, але шырше запрезентувати на высокым рівни лемківску культуру.

Проґрам святкувань зачне ся привитаньом через ведучу Стоваришыня «Руска Бурса» в Ґорлицях, Наталию Малецку-Новак, згромадженых. Пак выступит бурсяный молодіжный ансамбль Терочка, якій запрезентує нам богатый лемківскій репертуар.

Ансамбль был основаный в 2008 р. і од початку мал за задачу анґажувати і покріпляти здібну лемківску молодіж і діти в іх артистичных знанях.

Богатство лемківского/русиньского фольклору підкрислит і другій з запрошеных ансамблів. Буде то PUL’S (ПУНА) з Пряшова – єдиный во світі професийональный русиньскій колектив, якій презентує автентичный і стилизуваный фольклор такой зо вшыткых части Карпатской Руси.

PUL’S не треба представляти, кєд же лемківску душу радує він веце як 65 років, а головно был слуханый товды, коли на його концерты ходили выселенці і іх діти з заходу Польщы, якы глядали того, што не было ім дане.

Памят на вікы

Помедже концертами буде як раз час на спільнотову памят. Посмертно одзначеный Золотым Крестом Заслугы буде тот, якій по роках недолі вызволил Руску Бурсу з чужых рук і привернул ій жытя.

Богдан Ґамбаль был як раз тым, хто реактивувал Стоваришыня «Руска Бурса» в Ґорлицях. За його справом ґорлицка бурса одродила ся не лем на папери в 1991 р., але остаточно в 2009 р. были ій вернути маітельскы права до історичной будівлі при ул. Сєнкєвича 28.

В тот ден вынятково памятати будеме і на інчых вызначых бурсаків, опікунів – вшыткых тых, што своє жытя, часто приватне, вільный час – посвячали орґанізацийным справам, жебы не вшытко пішло на дармо, жебы ся не лем консервувало, але фурт лем розвивало.

Спомнийме хоц бы на першых ведучых ґорлицкой бурсы – так тых сперед выселінь, як і тых по 1991 р. Памятайме і на тых, што ґаздували при бурсі, кєд треба было плекати єй як свій рідній подворец.

Будут гості, буде гостина

Святкуваня 30. річниці одроджыня єдной з найважнійшых довоєнных лемківскых орґанізаций проходити будут при участи чысленных гостів з заграниці.

Будут то делеґаты і гості XVI Світового Конґресу Русинів, якій в днях 10.-11. вересня/септембра одбуде ся в Креници. Тогорічный конґрес орґанізує сестрина до Руской Бурсы орґанізация – Стоваришыня Лемків.

Концерт пляново одбуде ся на ґорлицкым рынку. Але кєд хвиля буде планна, буде він перенесеный до Ґорлицкого Центру Культуры. Гостина – як все – в просторах Руской Бурсы. Весельме ся, бо єст чым.

Koncert zrealizowano dzięki dotacji Ministra Spraw Wewnętrznych i Administracji w ramach zadania pn. Pamięci naszym Bursakom – koncert galowy (umowa nr 12-25/WMNiE/2021).