Ожывлены ремесла у Вігорлатьскім музею

Вігорлатьскый музей в Гуменнім у співпраці з лекторами ремеселных традіцій реґіону вышнього Земпліна позывають почас літа 2023-го року до ареалу Експозіції народной архітектуры і бываня (сканзену) Вігорлатського музею в Гуменнім.

Як інфомровала Яна Федічова з Вігорлатьского музея, і в тім році продовжує літній проґрам ремеселно-фолклорного ціклу традічных ремеселных варштатів і супроводного проґраму з назвов Ожывлены ремесла – Творчі і освітні події 4.

Творчі ремеселны варштаты, тематічны выставы і супроводный проґрам будуть проходити в ареалі сканзену почас штирьох неділь од 16-го юла до 27-го авґуста. Події будуть проходити в природнім оточіню сканзену, котрый є збудованый як село з початку 20-го столітя з автентічныма деревяныма хыжами, з традічным выбавліньом, автентічным заряджіньом і ремеселныма выробками при дотриманю традічных выробных поступів і матеріалів, якыма были дерево, глина, вовна, полотно ці метал.

Цікл одкрыє ся 16-го юла, коли спробовати буде мож роботу корытарів, котрых старе ремесло представить Мілан Карля із Снины. Гончарьску ділню буде мож спробовати 30-го юла, і роботу гончарів одпрезентує Ярослав Лехан з Тополі.

Роботу з полотном і кроснами буде мож приучіти ся 13-го авґуста з Любіцьов Таларовічовов із Снины. В тот день так само буде мож учіти ся ковальске ремесло зо Штефаном Баранчіком із Каменіці над Цірохов. На кінцю літа, 27-го авґуста, представлять в сканзені різбярьску роботу Марія і Ладислав Горватовы з Колоніці.

В рамках творчіх варштатів про навщівників є приготовленый і проґрам переглядкы сканзену з унікатнов деревянов Церьквов святого Михаіла Архістратига з 18-го столітя, домами і інтересныма господарьскыма будовами, якыма суть водный млин, традічны сыпанці і півніці, як і много далшого.

Музейный проґрам є конціпованый як освітній і забавный екскурз до автентічных ремеселных реалій нашых предків з одказом на їх зручность, традічны ремеселны выробкы реґіону і всокочены ремеселны поступы, котры суть частьов културной дідовизны реґіону.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА