Ожывлены ремесла і тот рік в гуменьскім сканзені

Вігорлатьскый музей в Гуменнім і реґіоналны носителі традічной културы вышнього Земпліна одкрывають в році 2021 про родины і любителів традіцій і фолклору продовжіня великого вакаційного проґраму спознаваня ожывльованя традічных ремесел.

Як інформовала Яна Федічова із гуменьского музея, музейный літній зажытковый проєкт під назвов Цікл творчіх варштатів традічных ремесел про верейность – Ожывлены ремесла ІІ проходить і тот рік в Експозіції народной архітектурі і бываня (сканзені) Вігорлатьского музея. Ожывлены ремесла будуть в Гуменнім почас пятьох неділь.

Почас двох юловых і трьох авґустовых неділь буде мож видіти і приучіти ся такым ремеслам як гончарьство, ремінярьство, ковальство, ткачство, корытарьство, шындлярьство ці роботі зо соломов. Кажда неділя буде мати і свій супроводный проґрам.

Неоділительносв частьов літнього ремеселного проґраму є і то, же собі люди будуть годны посмотрити сканзен і окремы ремеселны майстерні, котры в сканзені доповнюють колекцію шістьнадцятьох історічных обєктів народной архітектуры бываня, народной господарьской і сакралной архітектуры выходокарпатьского реґіону.

Перша ремеселна неділя буде проходити вже 11-го юла, остатньов бы мала быти неділя 22-го авґуста. Орґанізаторы звертають увагу на то, же проґрам буде ся рядити подля актуалных епідемічных наряджінь, котры будуть прияты про окрес Гуменне.

Жрідло фотоґрафії: www.muzeumhumenne.sk/skanzen.html.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА