Отец Василь Шереґі і село Ломне при Стропкові – проґрам «Говорить Пряшів» – пятниця, 20.00 год.

Радийо Русин.фм з Братиславы як каждый тыжден приносит порцийку вісти о плянуваных культурных подіях і роботі русиньскых інституций – музею, театру і ансамблю Пульс.

В Книжници.фм бібліотекар Ігор Латта буде чытал урывкы оповіданя Мариі Мальцовской пн. Покустове горнятко.

Целебритом того тыжня буде Василь Шереґі – священник, професор і культрный діяч медже Русинами на Підкарпатскій Руси та в діаспорі в Зъєднаных Штатах Америкы. Вродил ся недалеко Іршавы в 1918 р. Скінчыл грекокатолицку семінарию і был рукоположеный в 1942 р.

Еміґрувал до Америкы в 1946 р., коли то Совітскій Союз анектувал Підкарпатксу Русь. Был редактором русиньскых часописів і новинок – Неділя, Лекциі, Фронт молодежы. В Америці был выкладовцьом русиньского языка і літургіі східнього обряду в семінариі св. Прокопа в місті Лайль (Іліноіс) та в семінариі св. Кірила і Методия в Пітсбурґу. Основал пітсбуржскій архієпархіяльный музей.

Петро Медвід в Перличках прочытат короткы вісти надрукуваны в підкарпатскій ґазеті «Неділя» в серпни/авґусті 1942 р. Будеме споминати на хлопа, котрый ся стратил при Волосянці, про громы, якы вдарили в хыжы в селах Нижні Шарды і Великым, про одзначыня медальом хроброго вояка зо села Убля за боі при Доні. Ґазета буде споминала на спекуляциі і нелеґальне гандлюваня і буде кликала зголошати урядам припадкы шпіонажных діянь знаных нашым людям.

Теодозия Латтова в Припоминці буде оповідала про русиньскє село Ломне при Стропкові.