Отець Роберт Піпта призначеный за нового єпарху в Пармі

Папа римскый Франціск призначів отця Роберта Піпту за нового єпарху Пармской єпархії, котра належыть під Піттсбурзьску митрполію. Новый владыка є священиком Візантійской русиньской єпархії у Фініксі а моментално є ректором Візантійской католицькой семінарії святых Кіріла і Методія в Пітссбурзі.

Призначіня публіковав у Вашінґтоні 31-го авґуста 2023-го року урядом Апостольской нуніціатуры в Споєных штатах Америкы. Інформує о тім портал Конференції католицькых єпіскопів Споєных штатів.

Біоґрафія нового владыкы

Отець Роберт Марк Піпта народив ся 7-го апріля 1967-го року в Анагеімі, штат Каліфорнія. Бакаларьскы штудії музикы в роках 1985 аж 1990 абсолвовав на Каліфорньскій універзіті в Ірвіні. Пак вступив до Візантійской католицькой семінарії святых Кіріла і Методія в Піттсбурзі, котру закінчів у 1994-ім році. На священика быв рукоположеный в тім самім році і став священиком Єпархії Ван Нуіс (днесь Фінікс).

Новопризначеный єпіскоп служыв як вікарій у Катедралнім соборі святого Штефана у Фініксі, быв адміністратором Парохії святого Штефана в Лас Веґас, духовным Парохії Святых Ангелів у Сан Діеґо, а од 2014-го року служыв ректором Візантійской католицькой семінарії святых Кіріла і Методія в Пітссбурзі, котра служыть про вшыткы єпархії митрополії. Єдночасно там учів і літурґічный спів.

Отець Піпта мав у єпархії множество функцій. Мож спомянути, же є дотеперь членом Меджієпархіалной і Єпархіалной комісії про музику і літурґію, быв єпархіалным нотаріусом, челном порадного орґану Візантійской католицькой семінарії святых Кіріла і Методія, членом Єпархіалной колеґії конзулторів і далшых. В минулости быв і директором єпархіалного молодежного табора.

Єпархія мала лем адміністратора

Єпархія в Пармі мала од януара 2023-го року лем апостольского адміністратора. 23-го януара Папа римскый Франціск выменовав владыку Мілана Лаха, довтогдышнього єпарху в Пармі, за помічного єпіскопа Братіславской єпархії.

Апостольскым адміністратором sede vacante Пармской єпархії став по выменованю владыкы  Лаха за помічного братіславского єпіскопа владыка Курт Бурнетт, єпарха Пассаіку. Тот так само як апостольскый адміністратор моментално старать ся і о Єпархію Фінікс а Екзархат святых Кіріла і Методія в Торонті.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА