«Оскар» для Юлиі Дошны!

Юлия Дошна остала лавреатком престіжной нагороды IGF Gold Star, называной «Оскаром фольклору». Піснярку доцінили м.ін. за ціліст артистичной діяльности. Вручыня нагорід прошло 6. мая тр. в Сату Маре в Румуніі на ґали IGF Gold Star.

«Не сподівала єм ся» – бесідує нам скромні Юлия Дошна. «Неєдна особа повинна достати, такых як я є веце» – дополнят.

Світова Федерация Фольклору, World Folklore Unin I.G.F., рішыла єднак доцінити лемківску артистку за єй вклад в промуваня рідной культуровой спадковины. В поясніню нагороды чытаме, што признана была «за ціліст артистичной діяльности, підпераня, баданя і промуваня на державным і медженародным рівни вартости традицийной культуры».

Амбасадорка лемківской співанкы

Не мож одмовити тому правды. Юлия Дошна долгы рокы (не будеме писати, же од парудесятьох, жебы не звертати увагы на рокы жытя) присутна є на вшыткых, бо не лем лемківскых, сценах, на якых презентує музичну спадковину Лемків. О єй выступ просят орґанізаторы розмаітых імпрез – од фестівалів, через вернісажы, упамятніня, по перегляды і інчы.

Роками была солистком Ансамблю Пісні і Танця «Лемковина», пак анґажувала ся в чысленны музичны проєкты (напр. не так давно Лемковина-Лем), але найбарже знана є з соловых выступів з товаришыньом акомпаніятора, найчастійше Мирослава Боґоня на акордеоні або на клявішах, ци Антония Пільха на лютни.

Голос Юлиі Дошны вызвучал і в нагороджуваным фільмі «Зимна война» в реж. П. Павліковского (продукция была аж і номінувана до фільмового Оскара). Початково сцена як Юлия Дошна, Штефанія Фецюх та Штефанія Бортничак співают пісню Під облачком мала быти вказана в фільмі, остаточно остал сам звук.

Артистка вельократні вела як конферансиєрка ріжны концерты і подіі, спілорґанізувала чысленны кєрмешы, вела варштаты співу – все пошырюючы лемківску культуру. Як повіла в єдным з інтервю: «Барз шаную польску ци украіньску културы, але в серци і душы чую ся Лемкыньом». Роками артистка вела дітячый ансамбль Веретено.

В остатнім часі Юлия Дошна заанґажувала ся в два проєкты, котрым посвячат тепер найвеце увагы. Першым з них є співоча ґрупа Руты Увиты. То парунадцет жен, якы співают a cappella народны лемківскы пісні (ґрупа уформувала ся як наступство варштатів веденых в конвенциі Мастер Традициі), хоц тепер репертуар пошырюют уж і о інчы співанкы. Другым проєктом є Племя – Меджепоколіньова Театральна Ґрупа.

Світова Федерация Фольклору

На майовій ґали вручыня «Оскарів фольклору» в Руминіі Світова Федерация Фольклору передавала нагороды іщы в рукы артистів і популяризаторів фольклору з Румуніі, Іспаніі, Литвы, Ізраіля, Італиі і Кіпру.

Світова Унія Фольклору, IGF World Folklore Unin, то орґанізация основана в 1949 році, найстарша на світі серед орґанізаций пропаґуючых традицийны культуры. Місцьом основаня Уніі была Франция, а днес зосереджат уж 56 держав з ріжных континентів. Єднат фольклористичны стоваришыня і ґрупы зо світа. Місийом IGF є підперати і пошырювати універсальны вартости, што выникают з фольклору, уміцняти реляциі медже нациями через целебруваня ориґінальности і окремости локальных культур світа, промувати ріжнорідніст.

Членами заряду IGF World Folklore Unin сут лідеры культурного і соспільного жытя своіх держав і реґіонів, якы орґанізуют фестівалі і подіі о промоцийным характері. Членкыньом зо страны Польщы є Малґожата Брода, директорка Інституту Нематерияльной Спадковины Карпатскых Громад, яка товаришыла Юлиі Дошні вчас ґалі вручаня тогорічных «Оскарів».

Юлиі Дошні сердечні ґратулюєме «Оскара»!

Фот.: архів Юлиі Дошны та Фб World Folklore Union IGF