Осиф Родак має нову книжку

Войнова минулость задута часом (Vojnová minulosť zaviata časom) має назву нова книжка історіка русиньского походжіня Осифа Родака. Подля слов автора є книжка присвячена 70-тій річніці Словеньского народного повстаня і 70-тій річніці Карпато-дукляньской операції. Тоты юбілеї припомянули сьме собі минулого року.

Публікація пописує різны бойовы дії, котры проходили почас боїв у 2-гій світовій войні на совітьскій, польскій і чехословацькій теріторіях. Міджі актерами суть членове 1-го чехословацького армадного корпусу в Совітьскім союзі, котры в загранічній леґії войовали од самого початку (2-гый найвекшый народ в тім корпусі творили Русины), аж до закінчіня боїв. Окремы оповіданя суть автором записаны на основі споминаня тых, котры пережыли тяжкы бої на Дуклі. Коло смутных оповідань нашли ся і веселішы, котры одбыли ся во вольнім часі, коло одпочінка, пише автор книжкы.

Книжка приносить і спомины жытелів із польского боку, котры пережыли найтяжшы бої. Чітатель ся дізнать і о покоріню Обшару коло Нижнього Комарника. Росповідать то прямый участник тых боїв. Но публікація говорить і о тім, яку важну роль мали жены почас войны, о їх роботі на радіостаніцях ці телефонных централах. Многы ся докінця прямо участнили боїв.

Найновша книжка Осифа Родака є його третьов публікаційов. На книжці брали участь і Мірон Микита і Ґабрієла Біланінова. Проєкт быв реалізованый з фінанчнов підпоров Міністерства културы Словацькой републікы. Книжкы підуть і до школ і бібліотек.

Осиф Родак ся народив 13-го юна 1943 року в Крайній Поляні. В 1947 р. ся гого родічі переселили до Доброславы, де пережыв дітинство і молоды рокы. Є абсолвентом Педаґоґічной факулты в Пряшові. Закінчів там історію і словацькый язык. Як свіжый абсолвент высокой школы настуив 1-го авґуста 1966 р. до Воєньского музею у Свіднику, в якім робив аж до 31-го децембра 2008 р. Зачінав як лектор, поступно ся выпрацовав на директора. Цілый жывот присвятив збераню спомин прямых участників дукляньскых боїв. Лекції передавав і на Інштітуті русиньского языка і културы в Пряшові в рамках семінарів карпаторусиністікы.

Петро Медвідь

Жрідло: Podduklianske noviny

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА