Орґанізація молоды.Русины підпорила референдум

В суботу 7-го фебруара 2015 р. буде проходити на Словакії референдум. В референдумі, котрый выкликала обчаньска ініціатіва під назвов Аліанція за родину, і на котрый вызберала веце як 400 тісяч підписів словацькых жытелів, будуть поставлены три вопросы.

Першым вопросом є, ці суть жытелі Словакії согласны, жебы манжелством не могло ся называти жадне інше сполужытя окрім звязку єдного мужа і єдной жены. Другым поставленым ворпосом є, ці суть жытелі согласны, жебы парам або ґрупам єднакого поглавя не было уможнене освоїня (адопція) дітей. Третім вопросом буде то, ці жытелі суть согласны, жебы школы не могли жадати участь дітины на навчаню в области сексуалного справованя і евтаназії, кідь їх родічі або діти самы не суть согласны з обсягом навчаня.

Аліанція хотіла в референдумі іщі єден вопрос, тот але не быв схваленый Конштітучным судом Словацькой републікы і быв выголошеный за протиконштітучный.

Од выголошіня референдума презідентом републікы Андрейом Кіском на Словакії проходить медіалный бой. На єднім боці стоять представителі ЛҐБТІ і джендер ідеолоґії, на другім боці церькви і Аліанція за родину, кідьже Римоатолицька церьков, Ґрекокатолицька церьков, Православна церьков і Євнагелицька церьков авсбурзкого вызнаня вже офіціално підпорили референдум і рекомендують віруючім трираз голосовати „гей“. В словацькых медіах але не діставають прихыльници референдума простор, тот ся давать лем ґрупам, котры суть проти референдума. Навеце суть в словацькых медіах бісіды о тім, же референдум вертать Словакію до середньовіку, же прихылници референдума суть гомофобны і не навидять гомосексуалів. Церьков такы означіня, але і сама Аліанція, вецераз одмітли і акцентують, же лем хотять хранити традічну родину і вартости.

Минулый тыждень, як єдина русиньска орґанізація на Словеньску ку референдуму выразила ся орґанізація молоды.Русины. У своїй пресовій справі пише:

„В мені молодежной орґанізації молоды.Русины бы сьме хотіли зареаґовати на сучасну сітуацію і актуалну тему в нашій сполочности. Ближачій ся референдум о охрані родины і манжелства є нагодов на перевіріня досправдовых вартостей в сполочности. І кідь сьме проповнены множеством інформацій, котры намагають ся нам різны ґрупы підсунути як погляд модерной добы, выросли сьме в традічній родині, де отець і матірь повнять незаступительну задачу. Не зохабме ся збаламутити свободов, котра є днесь оправданьом многых абсурдных реалностей. Запойме ся до референдума і підпорьме досправдовы вартости, котры были платны нелем про нашых родічів, старых родічів, але мусять платити і про сучасны і будучі ґенерації.“

Референдум підтримав і папа римскый Франциск. На Словакії окрім хрістіаньскых партій підтримують референдум і мадярьскы партії MOST-HÍD i Партія мадярьской комуніты, але таксамо і мадярьскы обчаньскы здружіня.

Петро Медвідь

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА