Онедолга модернізация капличок в Бересті

Онедолга зачне ся модернізация двох лемківскых капличок в Бересті, в новосандецкым повіті. Буде она можлива завдякы дофінансуваню, котре ґміна Крениця отримала початком липця/юлия 2020 р.

Обєкты, про котры бесіда, то дві стоповы капличкы з фіґуром Йоана Крестителя та з фіґуром св. Миколая. Берест отримал дофінансуваня з Саморуяду Малопольского Воєвідства, котрый каждого рока оголашат конкурс під назвом «Капличкы Малопольщы», завдякы якому можут быти ремонтуваны і русиньскы капличкы на Лемковині.

Результаты тогорічного конкурсу были схвалены постановом уряду 1. липця/юлия. На єй основі того рока грошы пішли на модернізацию близко 50 памятковых капличок, фіґур і придорожных крестів. Уряд воєвідства передал на тоту ціль в сумі близко 500 тис. зл. На модернізацю берестяньскых капличок выділена є сума 9,5 тис. зл.

Капличкы находят ся на обшыри села, при воєвідскій дорозі но 981. Вписаны сут до Ґмінной Евіденциі Памятників Міста і Ґміны Кренция. Обшыр робіт обнимат полну технічну і естетичну консервацию фіґур разом з основами з піскового каменя, ремонт деревяного огороджыня і додатковы охоронны роботы. Цілю є привернути капличкам історичный характер. Цілковитый кошт ремонту то близко 22 тис. зл, з чого 12 500 зл то вклад ґміны, решта, як уж было спомянуто – дофінансуваня воєвідства. Берестяньскы капличкы мают быти выремонтуваны до кінця жолтня/октобра того рока.

Серед успішні зарахуваных тогорічных внесків, окрем капличок в Бересті, дофінансуваня отримала тіж ґміна Ропа на ремонт камінного креста з 1907 р., якій є в Лоси, в ґорлицкым повіті.