Ондавка має по вікенді самосправу. Приєднаня до друго села не буде

Село Ондавка Бардейовского окресу ся суботніма доповнюючіма выборами до орґанів містных самосрпав, в котрых собі аж 48 сел на Словакії, якы не мали зволену повну функчну самосправу, выберали своїх кандідатів, сохранила од того, жебы была приєднана до іншого села.

Міністерство внутрішніых справ Словацькой републікы притім минувшый рік уж ани не раховало з іншов алтернатівов як з тов, же Ондавка як окреме село з мапы счезне. Ондавка собі в двох по собі ідучіх выборах не знала зволити ани старосту, ани депутатів сільского заступительства. Раховало ся з тым, же село, котре было довгый час нефункчным, буде приєднане до Бехерова або Вышньой Полянкы.

Зволили старосту і трьох депутатів

Ондавка, котра має днесь 15 жытелів ся дословно спасла на остатню хвілю. Як інформовала пресаґентура TASR, по выборах, котры проходили 3-го октобра 2020- го року, новов старостков стала Луція Васілеґа, котра кандідовала за партію Most-Híd. Окрім того собі Ондавчане зволили і трьох депутатів сільского заступительства.

„Остатній бывшый староста абдіковав із функції і одвтогды были повторяно выголошены доповнюючі выборы до орґанів самосправы, причім ся не нашов жаден кандідат, аж дотеперь,“ додав.

Ондавка так натеперь не досягне нехоченого первенства, бо як довгодобо нефункчне село бы была першым селом, на котрім бы ся зреалізовав процес приєднаня до іншого села. Процес быв притім уж од минувшого року зачатый.

Проблемы не кінчать

Проблемы зволіньом старосты і депутатів не кінчать. Ондавка мала довг, банковый рахунок быв заблокованый екзекутором. Село ся теперь буде мусити фінанчно консолідовати. То бізовно не буде легкый процес, кедьже в нім жыє лем 15 людей і розрахунок села залежыть о чісла жытелів.

В остатнім часі, коли село не мало функчну самосправу, ся о основны справы старав головні Бехерів, котрый помагав Ондавці наприклад із тым, жебы мали вывезеный одпад. Якраз Бехерів быв горячім кандідатом, до котрого бы ся Ондавка приєднала, покля бы зістала нефункчным селом і завершыв бы ся процес злучованя сел.

Выборы і в далшых русиньскых селах

Доповнюючі выборы до орґанів містных самосправ проходили в суботу іщі і в далшых двох русиньскых селах – у Варадці і Маківцях.

В Маківцях Стропківского окресу выберали старосту. Маківчане вырішовали меджі двома кандідатами. Старостков стала Гелена Штефанцьова, котра кандідовала за партію Sloboda a Solidarita. В селі проходили доповнюючі выборі на основі того, же попередній староста вмер.

В селі Варадка Бардейовского окресу могло голосовати 169 людей. Выберав ся староста. На голосованю брало участь 51. Старостом став Андрій Куримскый, котрый быв єдиным кандідатом.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА