Округлый стіл з нагоды сторічніці выданя русиньской ґраматікы

Як інформовала аґентура Рутенпрес, 29-го септембра 2023-го року в просторах Заводу про културу войводиньскых Русинів у Новім Саді одбыв ся округлый стіл з нагоды округлого юбілея – сторічніці выданя Ґраматікы бачваньско-русиньской бісіды (оріґ. Граматика бачваньско-рускей бешеди).

Ґраматіку у 1923-ім році в Сримскых Карловцях выдав єден із найвызначнішых просвітителів Русинів на нижній землі Гавриїл Костельник. Округлый стіл орґанізовало Дружство про русиньскый язык, літературу і културу.

В рамках події одпрезентовало свої рефераты дакілько науковців, котры занимають ся тов варіантов русиньского языка, меджі іншым Михайло Фейса ці Юліан Рамач. Як інформовала аґентура, рефераты, котры были одпрезентованы, будуть надрукованы в 29-ім чіслі научного журнала Studia Ruthenica, котрого выдавательом є Дружство про русиньскый язык, літературу і културу.

Як было повіджено на округлім столі, Костельник усвідомльовав собі, же якраз народна бісіда має быти тов основов, на котрій має ся штандардізовати і кодіфіковати язык бачваньско-сримскых Руснів. Процес, котрый наштартовав Костельник выданьом ґраматікы, быв процесом нелем еманціпації языка, але і самой русиньской комуніты на нижній землі.

„Хоць Костельникова ґраматіка у дакотрых областях не была найконзістентніша, веце як пятьдесять років, в періоді ключовых културных і націоналных здобытків русиньской комуніты на тій теріторії, была фундаментом, на котрім є кодіфікованый наш язык,“ пише Рутенпрес.

І кедь пізніше была Костельникова ґраматіка актуіалізована, но головны основы зістали не дотулены дотеперь. На основі ґраматікы Костельника повстав літературный русиньскый язык в тамтешній варіанті.

На округлім столі были одпрезентованы і новы публікації. Директор Дружста про културу войводиньскых Русинів Саша Сабадош подаровав часть тіражы Правопису русиньского языка з правописным словником (оріґ. Правопис руского язика з правописним словнїком), котрый выдали, жебы передовшыткым каждый учітель русиньского языка мав свій фалаток.

Фото: Рутенпрес.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА