Округлий ювілей священника парохій на Лемковині: Ґладышова, Реґєтова, Ждыні і Конечной

3. мая 2018 р. в православній церкви Покровы Пресвятой Богородиці в Ждыни ювілей 20. річниці супружества та рукоположыня святкували о. др Аркадий Баранчук з імостю Катерином. Єдночасно, о. Баранчук од высвячыня на священника, двадцет років тому был одраз направлений служыти на Лемковину.

Божеску Літургію, окрем ювілята, служыли священникы з парохій такой од західньой по східню Лемковину. Присутний был тіж гіст з сусідньой лодзіньско-познаньской єпархіі, настоятель православной парохіі в Кракові. По службі на середині ждыньского храму был правлений святочний молебен з нагоды двоіх ювілеів. Дальше, слово до ювілятів і вірных выголосил парох Ганчовы, о. митр. Володислав Канюк. Передал поздоровліня од владыкы перемышльско-ґорлицкой єпархіі, архієпископа Паісия, якій в тым часі пребывал заграницьом. Священник розповідал про шыроку діяльніст о. Баранчука, а такой його пут на Лемковину, внет по рукоположыню. Зазначыл, што радістю православного священника є тото, што має свою імост, котра фурт єст підпором, маючы тяжшы хвилі в своій службі.

Голос забрал тіж війт ґміны Устя Ґорлицкє Димитрий Рыджанич, якій так само поздоровил ювілятів. Присутны были радны ґміны, урядникы. Не бракло і представителів пожарной стражы. Од 2016 р. о. Баранчук полнит функцию малопольского воєвідского капеляна пожарництва. З поздоровлінями выступили тіж члены парохій, котрыма од двадцетьох років завідує священник.

О. др Аркадій Баранчук народил ся в 1973 р. на Підляшы. В 1992 р. скінчыл загальноосвітній ліцей, здаючы матуру, а пак закінчыл православну семінарию. В квітни/апріли 1998 р зачал ся священничий пут о. Аркадия на Лемковині. Товды же, владыка Адам (Дубец) рукоположыл о. Аркадия Баранчука і направил на парохіі Ґладышів (з філийом в Реґєтові) та до парохіі Ждыня (з дочырньом церквю в Конечній). Од 2001 р. ведут вєдно зо женом діяльніст в Православным Осередку Милосердя Елеос в Ґладышові. Парох разом з вірныма піднял ся труду збудуваня церкви в Реґєтові в лемківскым архітектонічным стилю, котра была посвячена в 2012 році. В плянах є побудувати нову церков в Ґладышові. В 2015 р. оборонил на Християньскій Богословскій Академіі в Варшаві докторску дисертацию пн. «Православна Церков на териториі білостоцкого воєвідства в роках 1944-1956».