Одышол діяч Федор Ґоч

В віторок, 5. червця/юнія 2018 р., вмер Теодор Ґоч, культурно-соспільний діяч і активіста, основатель Музею Лемківской Культуры в Зындрановій.

Федор Ґоч вродил ся 28. червця/юнія 1929 р. в Зындрановій. Освіту в рідным селі перервала му война, вчас котрой служыл в войску, наперед в совітскым – в остатніх роках войны, пак в польскым. По войні деякій час жыл на чыжыні, але в 1954 р., як першому Лемкови, повело ся му вернути жыти на Лемковину. Того самого рока Федор Ґоч основал першу повоєнну орґанізацию – Ансамбль Пісні і Танця села Зындранова.

На початку 60. років ХХ ст. стал ся активным діячом лемківской секциі при Украіньскым Соспільно-Культурным Товаристві. Был вельорічным членом і солистом Ансамблю Пісні і Танця «Лемковина», котрий поміг основати. Підперал спілпрацу медже лемківском і украіньском еміґрацийом а жытелями старого краю. В 1968 р. довюл до основаня Музею Лемківской Культуры, котрий діє в Зындрановій по днес. Был єдным з основателів украіньского Обєднаня Лемків в 1990 р. Започаткувал орґанізуваня культурной імпрезы Од Русаль до Яна та печатаня музейного квартальника «Загорода». Реалізувал ся і в писменничій обшыри. Был автором історично-споминовых публикаций (прим. книжкы Лемкы в борбі за свою і не свою недолю, спілавтором котрой є Адам Барна), статий, репортажів. Написал пару єдноактовых пєс, сценарий до фільму Лемківскє весіля, автобіоґрафічну книжку Жытя Лемка та інчы.

Похоронны богослужыня зачнут ся в четвер, 7. червця/юнія 2018 р., о 11.00 год. в православній церкви св. Миколя в Зындрановій, котрой Федор Ґоч был долголітнім старостом. Мал 88 років.