Одкрыли 11-ый річник Studium Carpato-Ruthenorum

11-го юна 2023-го року в просторах Пряшівской універзіты в Пряшові одкрыли 11-ый річник Studium Carpato-Ruthenorum – Меджінародной літньой школы русиньского языка і културы.

Літня школа тот рік орґанізує ся першый раз од 2019-го року, кедьже попередні рокы были позначены пандемійов і проблемами з подорожіньом загранічных штудентів, котры традічно творять векшу часть заінтересованых.

Пряшівска універзіта в Пряшові, в рамках котрой діє Інштітут русиньского языка і културы, є єдинов універзітов у світі, котра орґанізує літні школы русиністікы. За веджіня універзіты тогорічных участників привітала проректорка, професорка Івана Цімерманова, і за орґанізаторів Зденка Цітрякова з Інштітуту русиньского языка і културы ПУ, і професор Павел Роберт Маґочій з Торонтьской універзіты в Канаді, якый є і лектором на літній школі.

Літню школу дотеперь абсолвовало 209 участників, з того было 136 загранічных – з Німецька, Австрії, Швейцарії, Україны, Польщі, Чеськой републікы, Булгарії, Сербії, Споєных штатів Америкы, Канады, Арґентіны і Кітаю.

Тот рік має літня школа 26 штудентів, з того 19 зо заграніча. Суть то штуденты із Споєных штатів Америкы, Канады, Чеськой републікы, Україны, Польщі, Хорватії, Румунії, Великобрітанії і Японії. Дакотры пришли, бо мають русиньскы коріня, но суть і такы, котры на літню школу пришли вдяка своїм професіоналным інтересам.

На Studium Carpato-Ruthenorum ся традічно ведуть лекції по русиньскы і по анґліцькы. Тот рік русиньскый язык по русиньскы учіть Кветослава Копорова, по анґліцькы Каріна Муляр. Історію карпатьскых Русинів в русиньскім языку буде передавати Володимір Фенич, і по анґліцькы Павел Роберт Маґочій.

Лектором етноґрафії по русиньскы є Валерій Падяк, по анґліцькы єй буде передавати Марта Ботікова. Тогорічне Studium Carpato-Ruthenorum має і новоту – лекції русиньской літературы по анґліцькы, котры буде передавати Нік Купеньскый. Мож конштатовати, же літня школа і тот рік здобыла в рамках лекторів капаціты русиністікы світового ранґу.

Літня школа русиньского языка тырвать три тыждні, а про штудентів суть приготовлены і супроводны події як творчі ділні, навщівы музеїв і історічных памяток повязаных з Русинами і русиньсков културов, ці навщіва Театру Александра Духновіча, на сцені котрого будуть годны тот рік видіти пєсу нашого будителя – Головный тарабанщік.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА