30. вересня 2014 р. в Щеціні буде проходило одкрытя улиці професора Івана Королівского. Нова улиця находит ся в щеціньскым Варшеві і получыт улиці Лончну (ul. Łączna) і Розтоцку (ul. Roztocka), будучы продолжыньом улиці князя Вартислава. Стало ся так на внесок працівників Поморского Медичного Університету, котрий был принятий рішыньом щеціньской Містецкой Рады но. XXXI/890/13 з 17. червця 2013 р.
Проф. др мед. наук Іван Королівскій вродил ся 20. мая 1934 р. в Ліщынах, на середній Лемковині. В рамках акциі “Вісла” выселений на Зеленогірщыну до Вітольдова (пов. Сулехів). По скінчыню в 1960 р. Поморской Медичной Академіі найперше працує дохторьом в щеціньскых шпыталях, потім розвиват тіж наукову карєру, специялізуючы ся в травматолоґіі і ортопедиі. Його науковий доробок то понад 100 прац з той обшыри. В 2001 р. отримал ступін професора звычайного. Вмер 17. мая 2012 р. в Щеціні.
![Рішыня Містецкой Рады в Щеціні о наданю новій улици покровительства проф. Івана Королівского.](https://www.lem.fm/wp-content/uploads/2014/09/Uchwala_RM_Szczecin_J.Kr--lewski-1024x721.png)