Одбыли ся презентації нового выданя книжкы професора Маґочія

Як інформовав голова Карпаторусиньского конзорціума Северной Америкы Ніколас Купеньскый, 9-го децембра 2023-го року одбыло ся далше засіданя конзорціума, в рамках котрого были обговорены події, якы в остатнім часі подарило ся зреалізовати.

Дві події были присвячены новому выданю популарной книжкы професора Павла Роберта Маґочія з назвов Our People: Carpatho-Rusyns and Their Descendants in North America (Нашы люди: Карпатьскы Русины і їх потомкы в Северній Америці).

Округлый стіл у Філаделфії

Карпаторусиньскый дослідный центер зорґанізовав округлый стіл з нагоды пятого выданя споминаной книжкы почас конференції Асоціації про славяньскы, выходоевропскы і евразійскы штудії у Філаделфії, в штаті Пеннсілванія.

Конференція проходила од  29-го новембра до 3-го децембра 2023-го року. Патріція Крафчік із Еверґріньской державной універзіты порівняла пять выдань той публікації а еволуцію їй наратіву.

Роберт Зекер із Універзіты святого Франціска Ксаверійского аналізовав у своїм рефераті і то, яку роль мали карпаторусиньскы іміґранты в Споєных штатах Америкы в рамках робочого руху. Знамый русиньскый актівіста із Споєных штатів, Річ Кастер, бісідовав о погляді Маґочія на націоналну ідентіту і реліґійный жывот.

Богдан Горбаль із Ню-Йорьской публічной бібліотекы говорив о общественім жывоті Русинів в рамках даной публікації. Ніколас Купеньскый аналізовав вопрос карпаторусиньской америцькой културы і цівілізації.

Як інфомровав Купеньскый, Карпаторусиньскый дослідный центер планує позберати реакції, одозвы на пяте выданя книжкы, і публиковати їх в академічнім журналі у 2024-ім році, в рамках 40-ой річніці першого выданя книжкы Нашы люди: Карпатьскы Русины і їх потомкы в Северній Америці.

Мож было стрітити ся з професором

Присутность професора Маґочія, котрый жыє в Канаді, схосновала і філія Карпаторусиньского общества в Делавер Валлі, у Філаделфії, котра 2-го децембра зорґанізовала з ініціатівы свойой головы, Джона Копчі, стрічу, яка так само была присвячена пятому выданю книжкы.

Стріча одбыла ся в Ґрекокатолицькій церькви Святого Духа, котра была основана у 1891-ім році. О книжці бісідовали окрім автора і Патріція Крафчік а Ніколас Купеньскый. По презентації, на котру пришло понад 70 людей, автор підписовав свою свіжу публікацію.

Русиньска родинна вечеря

В тот самый день у Філаделфії Карпаторусиньскый дослідный центер зорґанізовав і Родинну вечерю, в рамках котрой веджіня центра – Павел Роберт Маґочій, Ніколас Купеньскый і Патріція Крафчік, привітали понад 30 карпаторусиньскых штіпендістів, актівістів і приятелів орґанізації. Вечеря святочно одкрыла ся русиньсков гімнов Вручаніє.

Як інформовав Карпаторусиньскый конзорціум Северной Америкы, історія орґанізовати такы вечері сягать до 2015-го року. Меджі гостями все суть люди, котры актівно залучены суть до карпаторусиньского руху і штудій, але і новы люди, котры вступують до того руху, а в будучности могли бы стати членами „родины“.

Подія не є лем вечерьов, але і місцьом, де ся діскутує о різных подіях, на котрых гості брали участь, ці планах до будучности. А головно є то о тім, жебы ся спознати особні.

„Родина на Родинній вечері каждым роком розростать ся, і каждый любить схосновати принагоду стрітити ся із старыма приятелями, а спознати новых,“ пояснили Елейн Русинко і Богдан Горбаль смысел орґанізованя той події.