Одбыла ся вырочна громада орґанізації Руска матка

Як інформує аґентура Рутенпрес, в суботу 24-го фебруара 2024-го року одбыла ся вырочна громада орґанізації Руска матка, котра є членьсков орґанізаційов Світового конґресу Русинів за Сербію. Засіданя проходило в просторах орґанізації в Руськім Керестурі.

Вырочну громаду вів председа Руской маткы Михайло Фейса і робоча презідія, а на засіданю обговорили ся оцінкы за минувшый рік, як і планы на тот рік. Участны были і головы містных орґанізацій з Коцура, Кулы, Вербасу, Городьского і Нового Саду, як і реґіоналной орґанізації в Сримі.

Як выходить з вырочной справы о фінанціях, Руска матка посередництвом проєктів і фінанцованя з інштітуцій забезпечіла на минувшый рік понад 1,2 міліона дінарів (понад 10 тісяч евр), з чого орґанізація фінанцовала много актівностей, а найвеце грошей выжадало собі орґанізованя 17-го Світового конґресу Русинів, котрый проходив в днях 17-го аж 19-го авґуста 2023-го року в Новім Саді.

Якраз Світовомо конґресу Русинів, котрого орґанізатором была Руска матка, дав ся найвекшый акцент у окремых оцінюючіх справах. На вырочній громаді далше бісідовало ся і о выдавательскій роботі.

В рамках планів на тот рік было повіджено, же попри постоянных културных подіях, котры суть вже традічны, Руска матка хоче обновити філмовый фестівал у Шіді, але так само хоче орґанізація намагати ся створити і многы далшы актівности, а рушати з вырішованьом актуалных потреб і проблем Русинів у Сербії.

На громаді было так само представлене найновіше выданя часопису Глашнїк РМ Руснак, котрый є офіціалным пресовым орґаном орґанізації. В рамках засіданя были так само призначены новы особы на посады секретаря і председы одбору про освіту.

Фото: Рутенпрес.