Одбыла ся стріча представителів націоналных совітів Словаків і Русинів

У суботу 17-го юла 2021-го року одбыла ся в Руськім Керестурі робоча стріча, на котрій брали участь представителі Націоналного совіту Словаків і Націоналного совіту Русинів у Сербії. Інформовала о тім аґентура Рутенпрес.

На стрічі были пидписаны русиньска і словацька верзія меморандума о співпраці тых двох совітів. Припоминаме, же меморандум быв підписаный в сербскім языку іщі в апрілю в Старій Пазові. При підписованю быв участный і Мілан Ян Піліп, председа Уряду про Словаків жыючіх в загранічу, котрій на своїй робочій навщіві у Сербії окрім Словаків навщівив і Русинів.

На стрічі в Руськім Керестурі свої скушености представили і вычеряли собі підпредседа Націоналного совіту Словаків Златко Шімак і председа Націоналного совіту Русинів Борислав Сакач, як і председове штирьох секцій тых двох народностных совітів.

Як інормовала аґентура, участны робочой стрічі дішли до заключіня, же русиньска і словацька народностна меншына, значіть обидва совіты, мають много сполочных тем і же суть до два близкы народы. Дефіновали ся і подобны або сполочны проблемы у штирьох обласятх културной автономії.

Стріча была першым кроком при творіню будучой співпраці. Совіты Русинів і Словаків хотять сполочно рішыти проблемы і передкладати їх перед державу на вшыткых уровнях. Як підкреслив председа Націоналного совіту Русинів, меморандум дає можливость двом совітам вєдно писати проєкты, через котры ся здобывають грошы.

Участны робочой стрічі навщівили в Руськім Керестурі і Катедралный собор св. отця Николая Чудотворця, де їх привітав містный парох Михайло Малацко.

Жрідло фотоґрафії: Рутенпрес.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА