Одбыла ся членьска громада писателів і семінар карпаторусиністікы

16-го марца 2023-го року в просторах Пряшівской універзіты в Пряшові проходили дві русиньскы події. Наперед одбыла ся членьска громада Сполку русиньскых писателів Словеньска, пак проходив 56-ый семінар карпаторусиністікы.

Семінары карпаторусиністікы были реґуларнов актівностьов Інштітуту русиньского языка і културы Пряшівской універзіты в Пряшові, но пандемія орґанізованя тых акцій перервала на три рокы.

Писателі актівны і в тім році

Як інформовав портал Академії русиньской културы в Словацькій републіці, громаду писателів вела предсидателька Сполку русиньскых писателів Словеньска Кветослава Копорова.

Тота інформовала о резултатах роботы за 2022-ый рік, а так само представила планы на тот рік. Орґанізація в тім році подала штири проєкты на Фонд на підпору културы народностных меншын. Іде о выдаваня двох новых книг, орґанізацію 10-го річника Літературного конкурзу Марії Мальцовской, і реалізацію вебсайту орґанізації.

Што до публікацій, котры хоче Сполок русиньскых писателів выдати, іде о книжку Міра Жолобаніча з назвов Горечій кавей, і книжку Марії Шмайдовой під назвов Під диков грушков.

Громада заключена была офіціалныма ґратулаціями переможцям минулорічного літературного конкурзу, але і вшыткым, котры на тім конкурзі брали участь.

Семінар по трьох роках

Як вже сьме спомянули, такой по членьскій громаді писателів одбыв ся 56-ый семінар карпаторусиністікы, котрый вернув по трьох роках.

Лекцію на семінар тот раз приготовив собі фаховый асістент Інштітуту русиньского языка і културы Михал Павліч, котрый занимать ся русиньсков літературов. На семінарі выступав з лекційов на тему Коміка стереотіпів у прозі Мірослава Жолобаніча.

Як інформовав портал, орґанізаторы семінара тот раз вырішыли закликати на подію і штудентів середніх школ, котры проявили інтерес о сучасну русиньску літературу. Были то штуденты з Педаґоґічной і соціалной академії а Середньой фаховой школы служеб в Пряшові.

На семінар прияли позваня і русиньсы авторы – Марія Шмайдова, Миколай Коневал, Мілан Ґай і Мірослав Жолобаніч.

Позад діскусії докторандка русиньского інштітуту Михала Голубкова представила найновішы выданя з области карпаторусиністікы за послідні три рокы, кедьже якраз так довгый час семінар не орґанізовав ся, і презентація найновішых выдань была все його реґуларнов частьов.

Фото: Зденка Цітрякова

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА