Одбыла ся членьска громада писателів

20-го фебруара 2019-го року в просторах Пряшівской універзіты в Пряшові одбыла ся членьска громада Сполку русиньскых писателів Словеньска, котрый веде як председкыня Кветослава Копорова.

На членьскій громаді, котра ся сходить раз за рік, рекапітуловала ся минулорічна діялность і одпрезентовали ся планы на рік 2019.

По три проєкты минулый і тот рік

Як інформовала председкыня орґанізації Кветослава Копорова, минулый рік дістав Сполок русиньскых писателів грошы на три поданы проєкты, котры были зреалізованы.

Было то выданя книжкы Міра Жолобаніча під назвов Хто ся сміє, є мудрый, далше реалізація 5-го річника Літературного конкурзу Марії Мальсовской, котрого переможцьом став Юрко Харитун і остатнім проєктом было вытворіня вебсайтовой сторінкы про сполок. Як раз нову вебсайтову сторінку участным членам громады одпрезентовав їй адміністратор, член сполку Михал Павліч. На новім сайті мож найти біоґрафії членів Сполку русиньскых писателів Словеньска, їх творы, рецензії на книжкы або актуалны інформації повязаны із жывотом сполку.

Подобны планы мають писателі і на тот рік. Сполку были схвалены грошы на выданя далшой, вже третьой і єдночасно остатньой із гуморістічной трілоґії Міра Жолобаніча під назвов Хто ся сміє, є здравый. Далше дістали писателі грошы на зорґанізованя 6-го річника Літературного конкурзу і на фунґованя свойой вебсайтовой сторінкы.

Русиньскых выдань є веце

Треба припомянути, же на громаді споминали ся лем проєкты, ці за минулый або тот рік, котры подав прямо сполок. Окрім того были у 2018-ім році выданы і далшы книжкы членами сполку, котры вышли у іншых выдавницьтвах.

Мож спомянути Миколая Коневала і його Пастуси і ґаздівство. Русиньскы обычаї зо Спіша, Юрка Харитуна з книжков Діяґноза: Фіґлї про дїти, Штефана Смолея з публікаційов Запискы обычайного вояка, Миколая Ксеняка і його Недоповіджене, Осифа Кудзея з выданьом книжкы Цукерь, мед і феферонкы, Даніелу Карпальову і їй дебут Серна в нераю і Людмилу Шандалову, котра выдала книжку про діти Ани бы сьте не вірили.

На Словакії окрім того вышли у 2018-ім році наприклад і два науковы зборникы ці книжный Ґрекокатолицькый русиньскый календарь.

Выбрали нового члена рады, громада буде в децембрі

Як участных інформовала Кветослава Копорова, минулый рік вмер отець Франтішек Данцак, котрый быв членом рады Сполку русиньскых писателів Словеньска. Намісто нього писателі до рады выбрали нового члена Міра Жолобаніча. Далше суть в складі рады Кветослава Копорова – як председкыня орґанізації, Аліца Вєтошевова, Зденка Цітрякова і Людмила Шандалова.

Сполок писателів має моментално 38 членів. За минулый рік орґанізація як властный вклад до проєктів дала суму 676 евр, причім з властным вкладом помагали спонзоры, якым председкыня подяковала. Господаріня орґанізації є мож повісти вырівнане.

Громада Сполку русиньскых писателів ся звыкла стрічати в місяці фебруар. На пропозіцію председкыні было схвалене, же громады будуть од того року проходити на кінцю рока, в місяці децембер. Членове орґанізації бы собі на найблизшій громаді мали выберати і нового председу. Сучасна председкыня, котрій кінчіть каденція, є у функції од 2010-го року.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА