Одбуде ся конференція присвячена Петрови Павлови Оросови

Мукачовска ґрекокатолицька єпархія приготовлює ся на беатіфікацію слугы Божого Петра Павла Ороса. Новомученик буде выголошеный за блаженого в селі Білкы 3-го мая 2025-го року.

11-го марца з той нагоды одбуде ся церьковно-історічна конференція під назвов Жывот і мученицька смерть слугы Божого Петра Павла Ороса. Конференція одбуде ся в Ґрекокатолицькім центрі імени Елеміра Ортутая в Берегові, і рефераты на ній будуть чітати домашні учены, як і гості з Мадярьска і Словакії.

Конференцію своїм приговором одкрыє Преосвященый владыка Теодор Мацапула – мукачовскый єпарха.

Із домашніх реферуючіх мож спомянути вызначного сучасното історіка Володиміра Фенича, котрый діє і на Інштітуті русиньского языка і културы Пряшівской універзіты в Пряшові. Із Мадярьска выступлять на конференції Др. проф. Томаш Вегше, Др. Дьордь Янка, і Др. проф. Бернардетт Янка-Пушкаш, вшыткы з Ніредьгазы. Свій реферат буде мати і отець архімандріта Марко Дурлак – протосінкел Пряшівской архієпархії.

Слуга Божый Петро Павел Орос (рр. 1917 – 1953) быв священиком Мукачовской ґрекокатолицькой єпархії, якый быв убитый совітьскым міліціонарьом.

Святочна беатіфікація одбуде ся 3-го мая в селі Білкы. Тото село было про отця Петра Павла Ороса послідньов офіціалнов парохійов, на котрій служыв перед ліквідаційов Мукачовской ґрекокатолицькой єпархії комуністічныма властями. Першый раз в історії Підкарпатя буде чоловік із той землі выголошеный за блаженого якраз на домашній землі.

Дікастерія у справах вызнаня святых інформовала о даті і місцю святочной беатіфікації отця Петра Павла Ороса 19-го децембра 2024-го року.