Одбуде ся 4-ый річник Русиньского фестівалу в Гуменнім

Вігорлатьскый музей в Гуменнім запрошать любителів фолклору в днях 7-го аж 9-го септембра 2018-го року на 4-ый річник Русиньского фестівалу в Гуменнім. Подія буде проходити в ареалі сканзену Вігорлатьского музею, в просторах Пріватной основной умелецькой школы на Кудловскій уліці і на намістю коло Містьского културного центру.

Першый фестіваловый день зачне о 16.00 год. кройованым ходом через місто. Інтересностьов тогорічного проґраму буде вернісаж выставкы фотоґрафій богатой діялности і выступлінь фолклорного ансамблю Хемлон Гуменне і співацькых ґрупы Гачуре і Босорочкы. Вернісаж є напланована на 17.00 год. в просторах умелецькой школы. В просторах школы будуть 8-го септембра уж од ранных годин проходити творчі ділні, мож буде ся навчіти традічны танці із области вышнього Земпліна.

Богатый фестіваловый проґрам почас третього дня зо зачатком о 10.00 год. обогатить в Православній церькви свв. Кіріла і Методія торжественна літурґія. Од 13.30 год. буде в ареалі сакнзену проходити културный проґрам під назвов Одказ предків. В рамках проґраму одбуде ся і реґіонална конкурзна переглядка фолклору дорослых із окресів Гуменне, Снина і Меджілабірці. Фестіваловый проґрам завершыть ся 9-го септембра зо зачатком о 16.00 год. сполочным концертом домашніх і загранічных колектівів, ґруп і солістів в проґрамі під назвов Співанков, музиков і танцьом на Намістю свободы коло Містьского културного центру. Выступаючі будуть із Словакії, Польщі, Росії і Чеськой републікы. Комплетный проґрам можете найти на плаґаті під статьов.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА