Одбуде ся 32-ый річник фестівалу Ружова заградка

Як інформує русиньска редакція порталу Радіо-Телевізія Войводины, 8-го мая 2022-го року одбуде ся в Новім Саді вже 32-ый річник фестівалу новой русиньской співанкы під назвов Ружова заградка.

Фестівал новой русиньской музичной творчости буде  тот рік проходити на сцені Сербского народного театру в Новім Саді.

Орґанізатором фестівалу є Радіо-Телевізія Войводины (РТВ), котра уж веце як три десяткы років плекать традіцію і културу Русинів. Тот рік буде на фестівалі представленых 15 новых композіцій, а інтерпретів будуть допроводити два орхестры РТВ – Великый народный орхестер і Великый тамбуровый орхестер.

Фестівал першый раз привітать і буде гостити велика сцена Сербского народного театру в Новім Саді. За словами редакторкы фестівалу Златіці Няряди Ружова заградка каждый рік приностиь новы мелодії русиньской співанкы, але і сохранять русиньскы традіції а културу. Як додала, русиньскый язык є єдным із пятьох языків, на котрых у 1949-ім році почало высыланя проґрамів РТВ.

Журі 32-го річника фестівалу новой русиньской співанкы Ружова заградка выбере три найліпшы композіції, і по єднім лавреатови в катеґоріях текст, аранжман і інтерпретація. Як каждый рік, і теперь публіка буде годна выбрати собі свого фаворіта.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА