Од днес свято гуцульского коня

Днес, 15. вересня/септембра, в реґєтівскій Стаднині Гуцульскых Кони зачынат ся ціловікендове свято повязане з расом того гірского коника. Реґєтів, хоц невеликє лемківскє село, на мапі Европы являт ся місцьом істнуваня найбільшого стада конів гуцульской расы. Серед богатого тридньового проґраму найдеме час і на стрічу з лемківском культуром.

Реґєтівскє Свято Гуцульскых Кони являт ся заєдно Загальнопольскым Чемпіонатом Кони Гуцульской Расы. Зато тіж єдным з основных пунктів проґраму сут вшелеякого рода змаганя повязаны з уізджаньом або поізджаньом коня. В перший ден подіі будут выключно спортовы змаганя. Артистична част, вчас котрой о 13.40 год. выступит наша бурсяна «Терочка», пройде заран, 16. вересня/септембра. 

Недільне пополудня принесе нам іщы єдну порцийку лемківской музыкы. Того дня артистичний проґрам отворит капеля «А де то давнійше строіло» з Коросна, фронтменками якой сут дві сестры Лемкыні – Анна Романьчак-Поляньска та Сабіна Романьчак.

Треба спомянути, же хоц реґєтівскы стайні являют ся більшыма, то формальні сідиба і головне одділіня стаднины находят ся в недалекым Ґладышові. Днешній комплекс Стаднины Гуцульскых Кони «Ґладышів» то найбільша в Европі стаднина кони той же расы. Коні сут предовшыткым выпасаны на луках в неіснуючым русиньскым селі Реґєтів Выжній, але тіж на полянах днешнього Реґєтова ци Ґладышова. В Бескіді Низкым находит ся, окрем тых двох, іщы вельо місц, де ся ховат гуцульского коня.