Обзерач Природы #80 – (покля што) послідній!

Колиси мусл прийти тот момент – перед Вами заповід посліднього (покля што) одтинка Обзерача Природы. Ближыт ся яр – сезон на вандрівкы по ріжных закутинах світа. Автор авдициі потрібує перервы од нагрываня, жебы мочы вернути до Вас по парох місяцях з новыма думками. Такы сут пляны, а што нас жде тепер, в 80. одтинку Обзерача Природы?

Поіхаме в околиці Нового Тарґу і посмотриме на Перелом Бялкы під Кремпахами. Єст то маґічне місце, де єдна з найбарже дикых гірскых рік в Польшы – Бялка – перебиват ся через вапняковы скалы і творит урокливы формы. Перелом єст під стислом охором, але не єст свобідный од проблемів звязаных з діяльністю чловека. Представлю характеристику того місця од каждой стороны. А ци вартат там поіхати? То уж самы рішыте.

Прошу сердечні слухати послідній одтинок в найблизшу пятницю 21. марця о 13.00 год. Проґрам буде повтаряный в суботу 22. марця о 7.00 год. та в віторок 25. марця о 15.15.

До стрічы на (радийовым) шляку!

джерело знимкы: Jerzy Opioła, Wikimedia Commons, CC BY-SA 4.0